凸肚陳瀅勁風騷認與姓何同居
陳瀅去年與賭王四房公子何猷亨拍拖，獲男友大方認愛！昨日「凸肚」出席活動的她全程風騷，並自爆與姓何的人同居一年，更甜笑稱「住得好開心」，令人不禁聯想到猷亨，但原來何姓人是何雁詩，大玩語言藝術！
陳瀅風騷自爆與姓何的人同居，但原來並非男友猷亨，而是老友何雁詩！
何猷亨未跟陳瀅返溫哥華見家長，因他仍處於觀察期。
陳瀅肚凸凸，戀愛中的女人難免有少少幸福肥。
去年「宅男女神」陳瀅（Jeannie）撻着賭王何鴻燊四房公子何猷亨，並雙雙蜜遊日本，Jeannie更獲猷亨大方認愛，確認其女友地位！剛在溫哥華放假十日的她，昨日叉足電兼紅粉緋緋返港出席活動，穿連身裙的她明顯肚凸凸，可能是拍拖太開心致心廣體胖！問到被指獲猷亨照顧而入住九龍站上蓋物業，Jeannie大玩語言藝術，自爆與姓何的人已同居一年：「我係有同人同居，都係姓何嘅，不過佢係何雁詩，同居咗一年，住得好開心，我哋一齊租住，業主唔係男友嗰邊嘅人。（被指包養唔開心？）我諗不實嘅報道，唔想提（開心男友幫你澄清？）阿Moon（劉佩玥）Sweet啲，佢同我講唔係我撬人牆腳，係我畀人（猷亨）撬牆腳。」她亦否認猷亨曾追求陳凱琳的傳聞。
男友未見家長
至於男友猷亨有否陪她返回溫哥華？Jeannie甜笑說：「因為我好耐冇返去，想同屋企人有私人時間，遲啲先。（屋企人有冇問你拍拖？）有睇到新聞，有講少少。」又指家人未見過猷亨，所以未知家人是否滿意：「未知，因為未見面。（有冇講啲乜？）咁又冇，始終未見過。（咁幾時見？）睇吓我哋兩個幾時一齊有時間返去，因為都要飛成10幾個鐘。（Ready帶男友返去啦？）未知，再穩定啲先。」
信用卡被盜用
Jeannie愛情得意，卻錢財失意，她自爆此行竟被人在美國盜用信用卡，更碌了四千港元光顧連鎖快餐店，為此她已致電信用卡中心Cut卡。
雖然猷亨未見Jeannie家長，但當問到她是否已見過四太梁安琪，Jeannie口窒窒說「都唔係」，並尷尬地說：「佢屋企人嘅嘢，我唔回應（四太開綠燈喎！）你哋講啫！你問番佢」問到怎樣與猷亨共度首個情人節？她卻晒命指日日都是情人節：「未諗，睇吓有冇安排，但未諗情人節點過。情人節想工作中度過，因為我放咗3個星期假，冇做嘢會悶。（唔驚男友投訴？）開心就每日都係情人節。（依家日日都係情人節？）拍拖係應該開心！（畀滿分男友？）要再觀察吓。（拍咗幾耐？）其實我哋讀書時已經識，識咗好耐，認識佢為人。」
採：名人組
文：專案組
陳瀅風騷自爆與姓何的人同居，但原來並非男友猷亨，而是老友何雁詩！
何猷亨未跟陳瀅返溫哥華見家長，因他仍處於觀察期。
陳瀅肚凸凸，戀愛中的女人難免有少少幸福肥。
|
鍾意就快D Share啦！
|
|
|
