掃呢頁CODE去手機

2016年2月25日 星期四

OSCARS 里安納度坐定粒六封帝 [壹週刊 - 1355] __,里安納度,M1,

電影精OSCARS 里安納度坐定粒六封帝第88屆奧斯卡金像獎於香港時間2月29日舉行,今年嘅主要獎項入圍名單,全部都係白人,搞到一班黑人演員十分無癮,甚至有傳會缺席以示不滿!焦點落喺一班擔大旗嘅男女主角候選人身上。競逐最佳男主角有眾望所歸,但總係與小金人擦身而過嘅里安納度狄卡比奧(LeonardoDiCaprio),女主角方面有兩位影后級人馬姬蒂白蘭芝(CateBlanchett)及珍妮花羅倫絲( ...


電影精

OSCARS 里安納度坐定粒六封帝

第 88屆奧斯卡金像獎於香港時間 2月 29日舉行,今年嘅主要獎項入圍名單,全部都係白人,搞到一班黑人演員十分無癮,甚至有傳會缺席以示不滿!

焦點落喺一班擔大旗嘅男女主角候選人身上。競逐最佳男主角有眾望所歸,但總係與小金人擦身而過嘅里安納度狄卡比奧( Leonardo DiCaprio),女主角方面有兩位影后級人馬姬蒂白蘭芝( Cate Blanchett)及珍妮花羅倫絲( Jennifer Lawrence),究竟最後邊位可以捧走小金人?

橫掃各大影帝 志在必得

里安納度狄卡比奧( Leonardo DiCaprio)

《復仇勇者》

里安納度十幾歲出道,靚仔外形有礙演技發揮,近十年積極轉型,事實證明非常成功,喺《娛樂大亨》( The Aviator)、《潛行凶間》( Inception)、《華爾街狼人》( The Wolf of Wall Street)等等有出色表現,證明自己唔係得個殼。金球獎、英國奧斯卡 BAFTA、美國演員工會獎等等,佢全部都拎過,偏偏就同最有認受性嘅奧斯卡無緣,提名過 3次男主角、 1次男配角都空手而回。

今次喺《復仇勇者》飾演喺雪山遇難嘅探險家,演技上佢演繹被團隊遺棄嘅內心戲非常出色,加上喺攝氏零下 40度低溫下艱辛拍攝,專業精神大大加分,絕對係歷來最有機會摘冠之作。最大對手係上年影帝艾迪烈明尼,喺《丹麥女孩》男扮女裝,不過奧斯卡歷史以來,只有兩個人試過「冧莊」,似乎機會不大,莫非黑馬米高法斯賓達有機會成為阻力?

新女惡鬥阿姐級

相比起最佳男主角嘅一面倒形勢,最佳女主角嘅競爭更加激烈。之前已經封過影后嘅珍妮花羅倫斯及姬蒂白蘭芝,實力毋庸置疑,不過時勢造英雄,今年得勢嘅係《抖室》嘅貝兒娜森,雖然只係 26歲,不過童星出身嘅佢經驗豐富,今次飾演被囚禁於房間,同兒子生活七年嘅單親媽媽,逃脫後再次面對真實世界。貝兒嘅演技獲得一致好評,更加橫掃多個頒獎禮嘅影后獎項,包括金球獎及美國演員工會獎,且看可否連中三元,打敗兩位阿姐,進身影后行列。

貝兒娜森( Brie Larson)

《抖室》

The Danish Girl《丹麥女孩》喚醒少女心

雖然後來唔多想老公做女人,但因為畫作有價有市, Gerda要周旋在這種極端複雜的關係中,都咪話唔慘。

今日你同我身處的社會,算是幾 open,雖說呢度未通過同性婚姻合法化,不過政府廣告日日播,宣揚平等對待不同性傾向同跨性別人士,男女之間的性別轉換,我們早已見怪不怪,然而換轉上世紀,人生中途想「轉性」邊有咁易。

以較具爭議性的「跨性別」題材作電影故事,講結了婚的另一半想變性,老公老婆怎麼辦?聽起來好像偏鋒,但撇除性別轉換,主角被覺醒的少女心,正促使他/她進行這場對自我、自由的抗爭。

全球首個變性人故事

自電影公布後,唔少人對此片充滿期待,改編自 2000年出版的跨性別小說《 The Danish Girl》,講述 20世紀丹麥的畫家夫妻 Einar及 Gerda Wegener,一齊去面對老公想變性做女人嘅故事,亦係史上首個性別轉換的真實個案。小說當時一推出即贏得唔少獎項,而電影監製仲花上十年時間籌備小說的電影版,劇本 08年落入《孤星淚》導演湯賀柏( Tom Hooper)手上,並立即認定扮過霍金、贏埋奥斯卡的艾迪烈明尼( Eddie Redmayne)擔演這位雌雄同體的角色,老婆就由當紮的艾莉西亞菲瑾德( Alicia Vikander)飾演。

要講出由開始兩公婆好恩愛、一顆少女心的醒覺,至到要如果擺脫現在,最後老婆支持「回復」真正女兒身,是好漫長的,如是者,電影重心着墨於二人在心態上的轉變。當初一男一女產生的愛情,到變成兩個女人之後,關係更複雜,感情好似昇華成一種無私的大愛,的確幾感人。

艾莉西亞飾演的角色,其實是一位前衞女性,她支持老公變性,亦被喬裝女人的老公激發創作靈感,令她在藝壇一炮而紅。

Johnny Depp老婆 Amber Heard有份演出,雖然戲份不多,不過勝在好鬼靚,真係好搶鏡。

影壇新勢力

片中孭飛的 80後奥斯卡影帝艾迪烈明尼及瑞典女星艾莉西亞菲瑾德,被譽為問鼎奧斯卡最佳男主角及女配角的大熱人選,特別是艾迪落力的演繹,從 Einar抱手的睡姿、笑起來眯住眼的神態,舉手投足都滲出淡淡的優雅氣質,除了得到《霍金:愛的方程式》的肢體語言顧問 Alex Reynolds的指導,他亦觀察其他女人的舉動,從中偷師。外間推測過這個高難度角色,有機會令艾迪再度蟬聯。而 27歲的艾莉西亞剛憑《 Ex Machina》勇奪金球獎最佳女主角,更成為 LV代言人的她,同樣不容忽視,二人均被視為當今影壇中的全新勢力。

其實艾迪扮女人係咪真係咁靚……我覺得本尊 Lili Elbe傳奇得多。

艾迪烈明尼話有留意自己老婆化妝的動作、姿態,成日觀察其他人去學做女人。

上映日期: 2月 25日

最佳女主角提名

姬蒂白蘭芝( Cate Blanchett)

《卡露的情人》

珍妮花羅倫斯( Jennifer Lawrence)

《歡姐當自強》

米高法斯賓達( Michael Fassbender)

《時代教主:喬布斯》

茜爾莎羅倫( Saoirse Ronan)

《布魯克林之戀》

夏綠蒂藍萍( Charlotte Rampling)

《 45 Years》

最佳男主角提名

拜仁康斯頓( Bryan Cranston)

《荷里活黑名單》

艾迪烈明尼( Eddie Redmayne)

《丹麥女孩》

麥迪文( Matt Damon)

《火星任務》

撰文:關錦雯、蘇韻詩


鍾意就快D Share啦!