熱爆娛樂: 雙喜臨門　慳住嫁　姊妹自費飛　鍾嘉欣 3年後息影湊仔 [FACE

2016年3月2日星期三

雙喜臨門　慳住嫁　姊妹自費飛　鍾嘉欣 3年後息影湊仔 [FACE - 458] __,嘉欣,李嘉欣,鍾嘉欣,MF,

溫哥華直擊

大台處女黨首領鍾嘉欣失驚無神傳出有餡嫁，逼不得已在最後一刻發表千字文宣布去年已秘密註冊喜訊，據悉收得咁埋都係遷就怕醜老公 Jeremy。

真面目

雙喜臨門　慳住嫁　姊妹自費飛　鍾嘉欣 3年後息影湊仔

失驚無神話嫁咗，估唔到猴年剛過就爆大鑊！處女黨永遠榮譽會長竟然有餡在先，係就係懸念咗小小！不過搵到真愛仲要雙喜臨門，點都係好事嚟嘅！恭喜晒呀嘉欣 BB！

相比起對上出嫁嘅花旦胡杏兒，一心諗住 3年後滿約就息影嘅嘉欣 BB真係樸素得多，絕無洗版式晒恩愛、又冇土豪式金手臂、靜靜雞收埋到最後一刻至公布婚訊；婚禮場地佈置簡潔溫馨，連姊妹都係自費飛去溫哥華、自費置裝、自家屈蛇陪嫁，你話好小家？我話呢啲至係知慳識儉真•女神，娶得過㗎！

胡杏兒同黃宗澤七年長跑話散就散，遇着李乘德唔夠一年就話拉埋，鍾嘉欣同伍允龍拍拖八年突然玩完，遇着脊骨治療師 Jeremy四日就話想嫁，所以話愛情唔係講年期論資歷，緣份到 timing啱，擋都擋唔住！舊愛伍允龍嗰頭至入大台小花叢中尋尋覓覓剛啱撻着劉佩玥，勢估唔到呢頭外形保守又低調嘅嘉欣 BB原來已經偷偷註埋冊有埋餡。上週六(27)返老家溫哥華擺酒前最後一刻，喜訊至通天！

杏身個裙褂廿萬、成身金器又話百萬，嘉欣 BB一睇就知講心唔講金，全身得一卡鑽戒同一對龍鳳鈪咁大把。

貴為大台花旦，嘉欣 BB嫁得好慳，婚紗、裙褂、金飾、婚戒都係簡潔樸素，不過溫馨淚水就絕對唔比人少！（網上圖片）

雖然唔講排場唔鬥豪，不過鍾嘉欣同家人就好客友善禮數周道，十分照顧到訪的香港傳媒，又由男家父母親自（左一、二）向傳媒派發利是。

平有平嫁

話晒都係一線花旦， 31歲嘉欣 BB人生大事偏偏搞得樸素過平民，場地佈置平實又少花亦冇金碧輝煌，地點選址在市郊會所 The Arbutus Club；出席賓客除咗四大處女黨姊妹，一概係男女雙方至親朋友，唔似得第二個搞到台慶夜一樣衣香鬢影星光熠熠，而大台除咗經理人 Pansy亦一個高層都唔見；出嫁裙褂款式手工平民到極，全身嫁妝亦只得兩對金鈪同隻一卡鑽戒；比起去年尾出嫁，身穿廿萬 3D訂制裙褂、堆起成身金鈪變小金人、仲要狂晒老公設計 4卡巨鑽嘅杏兒，真係樸實到一個點。不過唔樸實唔低調，就唔係嘉欣 BB

繑實老公

一對新人留在會場直至凌晨一點至離開，鍾嘉欣甜絲絲拖住老公，而新郎 Jeremy就怕醜都用婚照遮面避鏡頭。

婚宴登記處鮮花氣球拱橋乜都冇，只得白色枱布簽名筆同基本款婚紗照一張，平民過平民！（網上圖片）

至於妝頭同姊妹服，一樣自己搞掂款式不一，四大處女為幫嘉欣慳住使認真唔話得。

姊妹講心

嘉欣出嫁了，估都估到陪嫁唔少得佢班處女黨好姊妹！因為一樣係虔誠基督徒，又一樣係加拿大長大竹昇妹，鍾嘉欣同李亞男、苟芸慧、王君馨和岑麗香合組「 Amazing Esthers」基督團契，好姊妹之唔係講耶穌唔講金，伴娘服飾自置、機票錢自己俾、婚禮前食住都由李亞男娘家提供，婚禮後就移師至新娘子鍾嘉欣家，四大處女機票酒店食宿加埋妝頭服裝，加加埋埋又慳咗一大筆！

婚禮之後，成班姊妹搬入梁家大宅，唔使住酒店。

處女陪嫁黨機票自己買，去到溫哥華食宿就靠姊妹，婚禮前兩晚入住李亞男家，三餐亦靠開餐館的亞男媽媽提供。

網上圖片

Hea做梁太

最終娶得女神歸嘅神秘人 40餘歲 Jeremy Leung一聽行頭又話梁乃鵬姪、又話醫生，其實只擁有現值約千萬港幣的溫哥華獨立屋自住、開設自家診所的脊骨治療師，並唔算富二代。

據知情人士透露，嘉欣 BB經胞姐介紹認識對方後，迅速認定對方仲喺當地註埋冊有埋餡，有傳嘉欣大肚 5個月，據知她打算在六、七月期間回港搞唱片，搞完便會專心等生，知情人士說：「佢想生之前搞掂晒啲手尾先，生完唞幾耐都未定，佢家陣都未知個 BB係仔定女！」其實嘉欣 BB一心做賢妻良母又話要生夠四個，可惜 14年與大台加簽賣身契，新約直至 19年至約滿，所以打定主意學似陳太茵媺一樣生仔大過天，養胎 hea做至約滿先全力引退。家陣搵到終生幸福，唔通仲同大台日捱夜捱為個冇乜人睇嘅大台視后獎咩！