| 小方話好珍惜同Stephy呢十年嘅感情。 | next 1/1 pre |
方力申跟鄧麗欣（Stephy）十年情驚爆分手，昨日兩人透過經理人公司發分手聲明，身在外地療傷的Stephy在社交網剖白內心世界，兩人因了解而分開，令大家眼中的童話破滅，她只能說聲對不起，今天失戀男主角小方分手後首度現身一個慈善活動。
睇分手聲明睇到手震
大會安排小方在儀式舉行前先接受圍訪，一臉悴憔的小方說：「首先好多謝大家嚟到今日嘅活動。」隨即先介紹一輪活動內容，之後他表示今次活動前受訪是他的決定，他說：「一啲咁唔開心嘅事，我諗我講唔到咁多次，希望大家一次過問。（心情如何？）其實我同Stephy係地下情開始，地下情好耐先畀人影到，我哋先至公開，既然開始係低調，本來分開都係想低調，但尋日睇到好多關心我哋嘅朋友短訊，包括傳媒、親戚朋友、粉絲，我想同大家講，我哋兩個知道十年係一個好長時間，要公布嗰刻我自己係拎住電話睇住公布嘅時間，我手係震得好犀利。」說到此時，小方口震震似想喊，忍不住哽咽續說：「其實係我哋兩個決定，唔係我自己決定，亦唔係Stephy自己決定，係我哋兩個人決定，呢個我好想畀大家清楚，其實我哋兩個，喺我哋套戲上映之前已經出現咗問題，但係我哋冇選擇公布嘅原因，我哋都怕有啲唔好心地嘅人攻擊我哋，會話我哋係電影宣傳，所以我哋唔想講住，第二我哋兩個真心好珍惜我哋呢段感情，所以呢....」之後就忍不住喊。
感恩10年情
小方抖大氣續說：「所以我哋決定有個冷靜期，呢個冷靜期，期間我哋兩個都經常出嚟傾偈、講嘢，期間講嘢過程，我哋都有傷心，亦都有喊啦，咁我哋最後一次傾偈，我哋見面傾偈，我哋十周年嗰日我哋一齊傾偈，最後就係和平分開。所以其實我哋掹車邊真係到咗十年，所以都好感恩。（分手最大原因係乜？）問題係我哋見過幾次傾嘅，係解決唔到嘅問題，結唔結婚唔係我哋兩個最大分歧，不過係有啲問題係解決唔到，我哋都有段好長時間嘅冷靜期。（邊個提出分手？）冇，係我哋兩個嘅決定。（有冇轉機？）將來嘅嘢冇人知。」
分手後有聯絡：身分唔同感覺都好唔同
網友指他蹧蹋了Stephy十年感情，他有否不開心？他說：「冇，男仔通常都係應該畀人講。」幾時正式分手？小方表示是個幾個星期前，問到是否被影到兩人在西環攬住喊的時候？他說：「唔係，嗰日都係傾緊，都係講番感情事。（蘊釀咗幾耐分手？）都係電影上映前。（同佢有冇聯絡，感覺如何？）身分唔同咗，感覺都好唔同。」Stephy是否好傷心？他坦言兩個都感覺傷心，問他所指解決不到的問題是否性格問題？他說：「其實大家都好關心有啲咩問題導致咁樣，對於我嚟講，問題唔重要，個結果重要。（會挽留？）唔係我一個人挽留，係兩個人嘅事。」
對有報道指他有第三者，又指他車外籍女仔？小方說：「我想講車鬼妹，當日我睇住嗰個人影我架車，但佢見我唔到，其實我有啲覺得作為報紙，唔應該就咁攞網上新聞就擺喺報紙度爆料，嗰張相係影唔到車裏面嘅人，影唔到我，影唔到個女仔，就可以講話我唔好嘅嘢，我覺得喺我傷口灑鹽。」
感嘆10周年已成過去
他有否想過挽留？他表示三個月的冷靜期，當然有試過，兩人合拍的電影《紀念日》是否導火線？他說：「其實拍攝時已經講過擔心會有影響我哋，結果可能都會有啲。（以前你哋一齊住？）冇，我哋從來冇一齊住。（十周年究竟幾號？）唉，都過咗，冇咗十周年。（以後會唔會避開合作電影或合唱？）咁又唔會，可以繼續合作，我哋同一間公司。（再問到佢講幾句心聲？）講咗。（去旅行散心？）未諗，（爸爸媽媽會唔會都傷心？）當然覺得好可惜。（Keep住聯絡？）會，佢都有Message我嘅，同我講唔好意思，要我一個人去面對咁多人。（阿爸阿媽幾時先知？）發咗聲明先知。（關唔關第三者事？）其實聲明、同Stephy都講咗唔關第三者事。（阿爸阿媽對你分手有咩感覺？）佢哋都係覺得非常可惜。」
|
鍾意就快D Share啦！
|
|
|
