破禁紅館唱《雞蛋與羔羊》 39歲Kay暫別樂壇「如果生到B好開心」
被封「高登女神」的39歲人妻謝安琪（Kay），前晚在紅館舉行個唱，宣佈暫別樂壇，更坦言會努力造人說：「如果生到小朋友我會好開心。」作為暫別前最後一擊，Kay前晚瞓身演出，谷胸擘髀趷籮自摸，極盡視聽之娛，她的囝囝張瞻更首踏紅館力撐媽咪，母子台上鬥chok跳街舞，為個唱掀高潮，Kay更破禁唱《雞蛋與羔羊》勉勵港人。
已有四年沒在紅館開個唱的人妻謝安琪，前晚再次踏足紅館舉行一連兩晚的「拾回謝安琪數愛世界巡迴演唱會香港站」，老公張繼聰前晚和昨晚都有現身撐場。舞台以行李篋作佈置，似是寓意她要收拾行裝暫別樂壇，在人生路重新出發。
前晚Kay在獻唱一曲《奮鬥》前在台上說：「之前我都做過煇哥顧嘉煇嘅演唱會，希望唱以下呢首歌（《奮鬥》）畀大家聽，因為我將邁向人生另一個階段，想鼓勵吓自己，開始另一個十年。」之後Kay開始講她的另一個十年大計：「完成咗呢個演唱會之後，我會休息一段時間，好多謝大家畀到我人生呢個咁珍貴嘅十年，由三十歲到𠵱家。過去十年，我認識到可以同自己分享心事嘅樂迷。」
作為暫別前最後一擊，Kay前晚在舞台上大解放，先後以旗袍、燈裙、公主look、天使look和低胸晚裝等九個造型出現的Kay，以一身「神奇女俠」look最為吸睛，她谷胸跳辣舞玩自摸擘髀，邊唱邊跳，雙眼狂放電，甚至在台上「倒奶」，令觀眾看得目瞪口呆。Kay除邀得麥浚龍、吳業坤和林海峰擔任個唱嘉賓外，還有一位份量十足的小嘉賓—她與老公張繼聰的8歲囝囝張瞻。張瞻前晚力撐媽咪，首度踏足紅館，跟Kay鬥跳街舞。儘管Kay台上趷籮努力喪跳，但張瞻跟其他小朋友又打觔斗又倒立擺chok爆甫士，風頭完全蓋過Kay，引得台下歡呼聲不絕。
【宣佈封咪】
■謝安琪前晚由女神化身燈神在紅館獻唱，宣佈個唱後暫別樂壇好好休息。
【真假安琪】
■女舞蹈員戴上謝安琪面譜為Kay伴舞，驟眼看幾可亂真。
【Deep V露腿】
■穿上deep V長花裙的Kay，坐在舞台上的巨篋獻唱《囍帖街》。
張繼聰冇經濟壓力演唱會上，Kay先後獻唱《獨家村》、《羅生門》、《囍帖街》及《山林道》等歌曲（詳見附表），並破禁演唱《雞蛋與羔羊》和《家明》兩首歌送給香港，曾被網民封為「香港樂壇民主女神」的她說：「啱啱呢兩首歌平時都好少唱，所以特別珍惜，多謝大家。」最後演唱會以一曲《跟我走》作為終結。
完騷後Kay於後台接受訪問，被問是否個唱後暫別樂壇時，她說：「我覺得係一個階段嘅完成，我之前講嘅休息就真係休息，公開活動我真係唔做㗎啦，可能朋友生日，喺吹蠟燭時唱首生日歌就會，唔會做公開演出。」Kay指今次休息用了年幾時間計劃，是否為趕生BB？她說：「可以嘅，我條線都係40歲之前，係適宜嘅，如果生到小朋友我會好開心，現階段我想家庭行先。」不過說到暫別年期是否一年，Kay則揚言未定，也許一年或年多也說不定。她並指跟公司合約差不多完成，所以工作的事可以暫時放低。問她老公張繼聰未來會有很大經濟壓力？Kay笑說：「生活豐儉由人，生活裏面，錢只係其中一樣嘢。」
【人妻解放】
■前晚一身神奇女俠look的Kay（左）谷胸趷籮扭腰，在台上大解放。
【老公捧場】
■張繼聰昨晚在台下力撐老婆開騷。
爆囝囝自薦上台說到囝囝張瞻前晚上台表演，Kay解釋是囝囝主動要求，她說：「有日佢問我演出場地係咪好大，我話係，如果上到台係歌手嘅光榮，阿仔即刻話想試吓，我叫囝囝自己安排吓，點知個仔好認真約埋啲朋友同鄰居一齊準備同練習。」另外，Kay近日在無綫劇《殭》的演技被網民批評，對此她說：「好多謝觀眾，其實有多選擇，但係佢哋都選擇睇咗，我都選擇多謝佢哋。」並強調角色造作、懶天真乃是角色設定。
採訪：張俊銘
攝影：仇志德、陳俊強
【囝囝獻舞】
■張瞻首踏紅館跳街舞毫不怯場，甚有父母的演藝細胞。
■張瞻又倒立又打觔斗，舞技完全將媽咪比下去。
演唱會曲目【1】頭盔
【2】勢不兩立
【3】篋神
【4】開卷快樂
【5】17度
【6】藝妓回憶錄
【7】鍾無艷
【8】廣東歌（林海峰合唱）
【9】浮雲
【10】獨家村
【11】潔淨皇后
【12】姿色份子
【13】香女人
【14】臭男人
【15】入型入格（Rap：周博賢）
【16】借過
【17】直角等於三角形
【18】雞蛋與羔羊
【19】家明
【20】我愛茶餐廳
【21】最好的時刻
【22】耿耿於懷（麥浚龍獨唱）
【23】羅生門（麥浚龍合唱）
【24】拾回
【25】因為愛情（吳業坤合唱）
【26】The One And Only
【27】囍帖街
【28】山林道
【29】跟我走
|
鍾意就快D Share啦！
|
|
|
