謝安琪拋胸擘髀 狂野告別
年屆39的人妻謝安琪（Kay）前晚在紅館告別演唱會上終極大解放，已為人母的她以「神奇女俠」谷胸裝性感登場勁歌熱舞，風騷得嘟嘴、自摸、扭籮、趷籮、夾腿及腿張開辣(興)全場，為告別騷畫上完美句號！而老公張繼聰在前晚及昨晚的兩場個唱上亦有現身撐場。
「女神」謝安琪（Kay）為紀念入行十年，前晚於紅館舉行一連兩場演唱會《拾回謝安琪數愛世界巡迴演唱會香港站》。全晚換上九套歌衫的Kay可謂「薄」到盡，不是透視就是露腰、騷長腿，當中以Bling Bling「神奇女俠」Look襯黑絲最有睇頭！谷出湯碗胸的Kay與七名女舞蹈員大唱大跳，貴為人妻的她撇下偶像形象，擺出不同誘人舞姿，包括：自摸、趷住扭籮、俯身露「C奶」、瞓在女舞蹈員背脊，最後更向住八千歌迷「腿張開」，令一眾「K迷」熱血沸騰。而前晚及昨晚的個唱上，老公張繼聰亦有現身撐場。
自嘲獨孤精難生存
由於個唱是Kay的告別作，她感慨表示好珍惜在紅館唱歌給大家聽，並交代騷後會休息一段時間：「呢個休息唔知小休定大休，總之內心同自己講想休息，好多謝大家同我走過咗人生三十歲，嚟緊四十歲呢個階段。」更直言不時覺得自己在行內格格不入：「覺得自己好孤獨，有時覺得做嘅事唔係咁易做，但好想堅持落去。每個歌手都獨一無二，希望大家記得咁樣嘅我。」唱到《奮鬥》時，Kay說：「今日好想唱呢首歌鼓勵自己踏入人生新一頁，更加勇敢去行出我另一個十年。」個唱間場，大銀幕播出多張香港靚景，並打上「致最美的香港」字樣。
40歲前生小朋友
過去十年唱盡無數金曲的Kay今次宣布暫別樂壇，令不少歌迷不捨。今次促成Kay休息決定，外傳是因與合作十年的公司Ban Ban Music約滿，加上一直傳她與經理人夏森美合作不愉快。不過飲水思源的Kay，在個唱上亦感謝夏森美過去的付出：「佢真心幫我做咗好多嘢，最初合作可能年紀有差距而有代溝，到咗今日愈嚟愈錫佢，覺得佢付出好多努力。」而向來言論惹火的Kay唱到敏感歌曲《雞蛋與羔羊》及《家明》時有感而發說：「呢兩首歌的確好少機會唱，所以特別珍惜今晚可以喺度唱。」
Kay騷後受訪，透露個唱後不會出席任何公開活動，問到是否造人？她說：「可以喺40歲前生小朋友係開心。（與公司約滿？）差唔多完，大家嘅友誼永遠喺度，其實公司每個人都有自己決定。（有工作就歸位？）暫時依家唔做嘢住。（今次係紅館最後一個騷？）暫時都係。」對於主演的無綫劇集《殭》遭網民抨擊演技，Kay感謝大家：「依家觀眾咁多選擇都睇我，佢哋批評我都有選擇聽唔聽，都好多謝佢哋。」而夏森美被問到與Kay的合約將屆滿，他在電話中說：「唔急，慢慢嚟，大家合作十年，合約唔重要，一年前大家已經知道佢要休息同商量過，將來合作睇緣分。」
文：音樂組
|
鍾意就快D Share啦！
|
|
|
