巴士司機工時長、休息時間少，有時車接車連去廁所時間都無，如遇上動輒鍾意投訴的乘客，分分鐘都可能因遲少少開車而無咗份工！網民Sam Kwong昨日在facebook「馬路的事討論區」群組上載一段影片，指一名巴士公司車長，因去廁所而遲了幾分鐘開車，即被一名男乘客挑釁兼拍片稱要投訴，並指該車長更因此被巴士公司即時解僱及不作任何賠償。
在相隔8小時後，另一網民Dick Wong，相信是該名作投訴的男乘客，上載另一段影片，指自己只是講一句「咁遲嘅」就俾人鬧，該車長還衝過來講粗口，要乘客打他，「我梗係投訴你㗎。」
從兩段影片可見，車長與乘客互相用手機拍攝對方，乘客不斷叫車長不要戴口罩，語氣挑釁地指：「我話你點解咁遲，你就話有生理需要，搞笑呀你都」，而車長就反問：「有咩問題？點解唔得？我屙尿點解唔得？」男乘客稱：「你攞住個電話慢慢行過嚟，我問你點解。」車長聞言即反駁：「點樣叫慢點樣叫快，有準則咩？」更激動地着乘客「郁佢」，又自動報上職號及公司電話，叫男乘客投訴他。男乘客隨即語帶輕佻地回應：「好，無問題，我會投訴你㗎，放心啦。」
影片上載後引起極大迴響，合共有近千留言，網民紛紛鬧爆該名男乘客「累人無咗份工」，「搞到人冇工做，仲上網攞彩，小心報應呀！」更有人迅速將該名男乘客起底，得知其任職的公司，並寸爆指：「你以後都唔好去廁所！否則我投訴你！」
Dick Wong其後回應時着網民理性討論，重申他只是投訴，無叫巴士公司炒車長，惟他的回應儼如火上加油，被網民駁斥，司機被炒是因為他將有關片段放上網絡平台及討論區，令事件搞大所致。
另有網民斥責巴士公司離譜，認為只因片段在網上公開，為免破壞公司形像，而解僱做了十幾年的老員工，還要無代通知金，做法太絕！更有網民籲打去巴士公司熱線，要求其收回解僱決定。
網民有話說
Siu Kee Mak：斷人衣食，尤如殺人父母
Carrie Lee：都係幾分鐘，需唔需要攪到人地無左(咗)份工？
豪子：咁趕時間……自己坐上司機位開車咪快囉！
Michael Leung：大家不如一人一電話打去X巴hotline(熱線)，要求取消炒人決定
※緊貼網民熱話，掌握最熱話題，請關注網民熱話fb：
http://on.fb.me/1L3m1ro
|
鍾意就快D Share啦！
|
|
|
