方皓玟(Charmaine)一連三場處女騷，噚晚喺旺角麥花臣場館舉行，王宗堯同女友黎紀君、關楚耀、連詩雅、蔡穎恩同林欣彤都有現身睇騷。至於鄭中基同黃秋生就擔任首場嘉賓。全晚Charmaine換上多套性感裝束，狂騷長腿露大背，加上擘髀拗腰趷籮，搞到現場觀眾V嘩鬼叫。期間Charmaine更畀男舞蹈員抬起狂轉，一度出現「倒奶」場面。演唱會其中一part 主打sexy dance，着上超短白色連身裙嘅Charmaine，要同兩個男dancers埋身玩人肉三文治，夾喺中間嘅Charmaine下體同pat pat都畀兩個男dancers貼到實一實，Charmaine一邊唱，兩個男dancers就一邊「un」大玩「3P」，期間男dancers雙手更喺Charmaine重要部位游走，意識相當大膽意淫。完騷做訪問時，Charmaine對於今次演出，笑言自己都覺得過份咗少少，但就話今晚第二場想去得更盡。問佢同男dancers玩人肉三文治時，有冇覺得佢哋「un」同摸到下體，Charmaine竟然話冇喎：「我真係feel唔到，當時我乩緊童冇諗咁多，我個下體都冇乜感覺，我淨係顧住隻腳夾唔夾得實，同埋顧住捉唔捉得實支咪。」Chamaine事後補充話自己打晒底做足安全措施，仲話做緊訪問都着住兩、三條底褲咁話。首次舉行賣飛騷嘅Charmaine，喺台上多次多謝做嘉賓嘅鄭中基同黃秋生，當秋生準備壓軸出場時，Charmaine介紹佢係心目中嘅大俠，係自己師傅。秋生就答佢話：「你話係大俠，我仲以為係狄龍㖭！」Charmaine即刻賣口乖話：「你型好多！」秋生之後自彈自唱自己首《冥想》，最後佢哋兩師徒仲齊齊向觀眾謝幕！
| (攝影：沈健程) |  抬高都只係小嘢 |  呢套超短白色連身裙堅係性感 |
 |  嘩！ |  以為咁就夠激，方皓玟話第二場想再去盡啲！ |
 |  嘉賓之一鄭中基 |  秋生仲唱埋《冥想》 |
|
鍾意就快D Share啦！
|
|
|
