港姐蔡思貝同男友麥秋成拍拖雖然係公開秘密，但兩人每次出街都好鬼謹慎，噚日就搭船到離島梅窩遠離人群，不過依然被本報讀者Mary「爆相」捕獲，Mary接受訪問話下晝大約4點幾，喺梅窩嘅銀礦灣度假酒店見到蔡思貝同男友等一行四人high tea，同行女友人就係巨聲幫何雁詩。Mary坐喺蔡思貝附近嘅餐枱，由於酒店環境好清靜，佢大爆聽到蔡思貝埋單時竟然呻窮話冇錢：「我見到蔡思貝食咗碗米粉，佢哋仲叫咗一啲點心、炸雞翼，埋單500幾蚊，但聽到蔡思貝好大聲話：『我冇錢噃！』同枱着藍色衫嘅係歌手張子丰，佢就攞咗120蚊出嚟，麥秋成見女朋友話冇錢，都攞咗300蚊畀埋女友嗰份，何雁詩就攞張500蚊紙，最後佢哋都係AA制，好肉酸囉！」問到蔡思貝話冇錢係咪語氣講笑咋？Mary就反駁：「唔係講笑，佢好認真㗎！」出身小康之家嘅蔡思貝雖然貴為港姐亞軍，但大台份人工有幾好真係眾所周知！估唔到佢公然話自己冇錢，除咗堅呻窮之外，唔知係咪都想嗲吓男友請食tea呢！Mary仲話蔡思貝呢日冇化妝，唔係好多人認到佢，其間佢同何雁詩行去洗手間時，有食客認出蔡思貝同佢say hi：「點知蔡思貝掂行掂過好鬼寸，完全唔理人，好似覺得自己係一姐咁行過，反而何雁詩就有少少笑容囉！」其他人知道佢係蔡思貝，仲話：「唔係呀，咁醜樣都攞到冠軍。」佢哋埋單之後就行去碼頭方向，全程都冇拖手好小心。
| (圖片由讀者Mary提供) |  蔡思貝同男友麥秋成、何雁詩同歌手張子丰，去咗梅窩 (圖片由讀者Mary提供) |  (圖片由讀者Mary提供) |
 |
|
鍾意就快D Share啦！
|
|
|
