鄧穎芝被唐紫睿摑：打波打埋人！
藝人鄧穎芝（Vangie）、唐紫睿（Hazel）、梁靖琪及SiS樂印姊妹等昨日在「Panasonic學界籃球邀請賽2016」中落場鬥波，最近玩格鬥上癮的Vangie及Hazel大晒鎖技搞氣氛，Hazel更出茅招抓面拉手，但仍無阻Vangie掃分，最終Vangie共獲得最高分的16分包括兩球三分波，堪稱最佳球員！
「Panasonic學界籃球邀請賽2016」昨日在灣仔修頓室內場館舉行，八位女藝人參與的名人邀請賽成為焦點賽事之一，鄧穎芝、SiS樂印姊妹及莫穎彤加入警察籃球大使隊，梁靖琪、陳偉琪（Vicky）、唐紫睿及趙哲妤則代表籃總名人邀請隊，八位靚女換上波衫落場獻技，獲得全場歡呼！
有多年打波經驗的Vangie及Vicky賽前被視為重點球員，結果Vangie不負眾望，一落場即跳投成功得兩分，愈戰愈勇，面對一眾男對手毫不怯場，結果全場共得16分包括兩球三分波，技驚四座！至於SiS樂印姊妹的駱胤鳴亦得六分，相反另一邊的Vicky接連射失最終只得兩分，Toby亦有兩分進帳，而其他女藝人則未有得分。最後籃總名人邀請隊憑藉其他男隊員的優秀表現，以48分比46分險勝由Vangie代表的警察籃球大使隊。
出茅招被吹罰
最搞笑是Vangie及Hazel將最近學成的MMA格鬥技搬到籃球場上，兩人賽前已不甘示弱鬥拗手瓜，更出動鎖技互相纏鬥一番，「火藥味」十足！跳波時旁述以格鬥好手介紹兩人，Hazel即與Vangie互起飛腳示威，非常搞笑！落到場Hazel一樣冇情講，狠狠Mark實Vangie，眼見被Vangie放甩，Hazel即施展「追魂掌」摑了Vangie一巴，結果當然被吹罰，摸住面的Vangie笑住大叫：「打波打埋人呀你！」但事實上兩人勁老友自然沒有芥蒂！
向對手再下戰書
賽後Hazel狂讚Vangie球技精湛，自己已十多年沒有打波，目標苦練一年後再向Vangie挑戰，她笑說：「原本諗住用身高優勢贏佢，但佢真係好快！」Vangie說：「之前嚟修頓室內場睇波就多，今次係第一次出賽，好享受，好滿意自己表現！（覺得Hazel茅？）唔係！打波梗係有身體碰撞嘅！但畀人打一拳唔係咁開心囉！」講到最後Vangie射失關鍵罰球，結果未能贏波，Vangie笑言已盡力，而且玩邀請賽最緊要享受過程。
此外，有「無綫新咪神」之稱的Vicky射失多球大為失準，她表示因前一日運動過勞影響表現：「對手冇咩力，早知尋日唔去打波惟有做多啲防守同控球。」她又惺惺相惜大讚Vangie表現出眾，無論跳投剷籃都相當了得：「可能佢打開MMA，完全唔驚同對手有碰撞。」
球賽得分表
警察籃球大使隊
鄧穎芝：16
駱胤鳴 @ SiS樂印姊妹：6
駱胤樺 @ SiS樂印姊妹：0
莫穎彤：0
籃總名人邀請隊
陳偉琪：2
梁靖琪：2
趙哲妤：0
唐紫睿：0
文：影視組、音樂組
|
鍾意就快D Share啦！
|
|
|
