熱爆娛樂: 有線跟 ViuTV去旅行　大台靠吳若希素顏破陣 [壹週刊

2016年5月19日星期四

有線跟 ViuTV去旅行　大台靠吳若希素顏破陣 [壹週刊 - 1367] __,吳若希,TVB,大台,ViuTV,Viu,M1,

探熱針

有線跟 ViuTV去旅行　大台靠吳若希素顏破陣

ViuTV主打真人騷，另類旅遊節目《跟住矛盾去旅行》成為熱話，大台見勢色唔對，安排許廷鏗、吳若希及胡鴻鈞素顏搞個玩轉台北團絕地反擊；連早已離地的有線，最近亦跟足 ViuTV，請來譚詠麟愛將顧芮寧孖住徐小鳳契女麥家瑜，走訪台灣拍《帶結他去旅行》，有乜抄乜，度橋都慳番！

見招拆招

梁國雄拍住曾鈺成的《跟住矛盾去旅行》成為熱話，還有基督徒高皓正同出櫃何韻詩接棒去愛爾蘭成功搶 fo；被 ViuTV㩒住打，大台見招拆招，要崔建邦特訓半年參選職業 MMA，反擊《 G1-格鬥會》外，再搵出位編導岑應搞素人美魔女真人騷，跟住仲有方丈三寶許廷鏗、吳若希及胡鴻鈞，食住「旅行」熱，搞個玩轉台北團。

「去台北快靚正，許廷鏗、吳若希同胡鴻鈞有班後生 fans，加上佢哋三個係老友，玩起上嚟會放啲，令個真人騷會好睇啲。」一名無綫人說。

大台找來許廷鏗、吳若希及胡鴻鈞去台北拍旅遊特輯，賣點是要三人全素顏出鏡。

ViuTV的《跟住矛盾去旅行》，剛播完高皓正與何韻詩的一輯，吸引力及話題性不錯。

有線拍的《帶結他去旅行》，以麥家瑜和顧芮寧做膽，雖然氣勢較弱，但亦有新鮮感。

全素顏上陣

許廷鏗、吳若希及胡鴻鈞一向聽話，可以搓圓㩒扁，大台要求素顏上陣作為 gimmick，三人亦冇 say no！

「大台要佢哋 100%全素顏，其他公司歌手冇可能咁做，其實最初吳若希都唔想，不過公司企得好硬，佢最後都妥協。」

拍旅遊節目，最開心係去到邊食到邊，啱晒許廷鏗、吳若希及胡鴻鈞三位愛食之人。

吳若希與胡鴻鈞感情很好，加上二人外形相襯，很有情侶檔的發展潛力。

胡鴻鈞、吳若希與許廷鏗夠青春活力，三人扮馬利奧跳起很傳神，動感十足。

高皓正與何韻詩到愛爾蘭拍《跟住矛盾去旅行》，兩人最終化解矛盾，破冰收場。

抄

為了追擊 ViuTV的《 G1-格鬥會》，大台搵崔建邦打職業 MMA，橋唔怕抄。

有線都做嘢

ViuTV愈做愈好，真人騷節目多人留意，一直表現得事不關己的有線電視台，亦後知後覺地抽吓水，整咗個《帶結他去旅行》真人騷旅遊節目，走訪台灣。

「有線搵咗阿倫愛將 Elaine Koo（顧芮寧），拍住環球歌手麥家瑜去台灣，拎住支結他四圍同人 jam歌，又喺台北街頭賣藝表演，係個以音樂包裝咗嘅旅遊節目。」有線工作人員說。

ViuTV避重就輕，看似先聲奪人，大台 J2其實大把真人騷，只係唔聲唔聲，玩浪費，方丈，你發夢呀！