黃子恆同裕美劃清界線後，轉頭就密會殼王頭寵朱晨麗。
娛頭
換女甩包袱 即棄人妻裕美 賤爆黃子恆速食朱晨麗
人妻裕美背住老公 Jason（林恩浩）同無綫小生黃子恆搞埋，驚爆婚外情！搞到人夫公開挑機，龜縮黃子恆最終出面認錯攬上身，更揚言「好想保護」裕美，但上週出席樂易玲生日派對時，卻轉晒口風，聲稱同裕美冇聯絡，暗示雙方關係到此為止。
搞出大頭佛後，黃子恆全力撇甩人妻包袱，週一（七月四日）晚，本刊更撞破他約會曾在《味想天開》做一對的朱晨麗，同到酒店飲酒傾心事。
搞完人妻，再進階惹埋老細殼王頭寵，黃子恆好大膽！
撇隊友撐枱腳
黃子恆被爆搭上人妻裕美，並有兩人疑似情慾短訊流出後，對方老公 Jason拍片發出「最後通牒」，逼龜縮黃子恆認愛，事件鬧得滿城風雨，三敗俱傷！
人妻只宜秘玩唔啱明愛，求甩身的黃子恆，決定速撇，同裕美斬纜。不過，呢頭撲火，嗰頭又點火！今次黃子恆更在太歲頭上動土，連殼王頭寵朱晨麗都唔放過。
本週一（七月四日），黃子恆相約洪永城、唐詩詠，還有朱晨麗、何雁詩打羽毛球，打完波，他同朱晨麗就撇低其他隊友，繼續下場。
黃子恆陪埋朱晨麗返屋企換衫後，再到附近的酒店頂層餐廳撐枱腳；為免被人認出，兩人刻意戴帽，並要求餐廳侍應安排坐露天較暗位置。邊食邊飲，磨足三粒鐘，先捨得埋單走人。
擘大眼講大話
離開見到記者，二人即尷尬彈開。再被斷正的黃子恆，即時黑面，甚至唔肯同朱晨麗一齊入𨋢。
壹：你哋兩個約會？
朱：一齊拍劇嘛！有其他演員同我哋一齊㗎！（擘大眼講大話）
壹：（問黃子恆）因為裕美事件唔開心，所以搵朱晨麗陪？
黃：我哋一班人啱啱打完波，食飯，唔關開唔開心事！
壹：而家同裕美關係點？
黃：又問！我講咗好多次！
壹：之前你話要保護佢（裕美），而家又話冇晒聯絡，點解突然劃清界線？
黃：即係每個人嘅保護方式，我諗我唔需要向其他人交代，總之我嘅立場就係咁！
斷正各自散
壹：同朱晨麗發展……（黃子恆即迴避鏡頭）
朱：我哋係同事同埋好朋友囉！啱啱去完馬來西亞（拍大台節目《星級健康 4》），係（望住黃子恆）我哋一齊去㗎嘛！
壹：所以你兩個特別投契？
朱：（甜笑避答）素顏唔好影我……
臨走前，朱晨麗不忘向黃子恆說：「係啦，你自己走！」好事被撞破，二人惟有各自散水。
舊年拍劇過電
無綫鬧小生荒，令黃子恆有機會發圍，連同張振朗、吳業坤、何君誠及何廣沛被封「新五虎」力捧。去年拍攝劇集《味想天開》，黃子恆獲躍升做男二，與做情侶的朱晨麗有不少親熱戲，其時，黃子恆更曾直言二人合作過到電。
「 Hugo（黃子恆）同朱朱（朱晨麗）不知幾有火花，兩個特別好傾， Hugo仲成日會買埋嘢俾朱朱食，服侍周到。記得有場戲拍佢兩個攬住親熱，佢哋投入到大家一睇就知係假戲真做，就算係鏡頭後， Hugo同朱朱都上晒身咁，成日對望甜笑， sweet到以為佢哋嚟真！」劇組工作人員透露。
黃子恆鍾意「速食」，朱晨麗亦喜歡收奀兵，一拍即合！由人妻進階到打老細頭寵主意，黃子恆真係愈來愈「大食」！
好「食」得
一直都係無綫奀星的黃子恆，母親是玄學家，哥哥任職網球教練，雖然不是大富大貴，但黃子恆冇負擔，冇經濟壓力；入行十七年的他，出名係食家，主播、小花、人妻，全部通吃。
殼王頭寵
11年，朱晨麗選港姐奪冠後加入無綫，但事業一直未有突破， 13年於重頭劇《衝上雲霄 2》做大閒角的她，卻在慶功宴上被欽點坐主家席殼王陳國強旁邊，獲老細賞識，朱晨麗即升呢變頭寵！自此，由大茄變阿姐，一劇接一劇；生活水準同樣十級跳，月入只有萬五蚊的她，入住月租十五萬的金鐘豪宅，全身名牌，出入有司機接送，坐頭等遊歐洲，之後更以七百萬購入將軍澳 The Parkside。
撰文、攝影、攝錄：娛樂組
|
鍾意就快D Share啦！
|
|
|
