早年憑住啜爆陳冠希（Edison）上位，現年21歲嘅o靚模謝芷蕙（Cammi），3年前撻着今年23歲嘅內地富二代B先生後，最近加入做老闆娘行列，喺荔枝角開店做批發，佢話自資6位數字開舖，男友只係負責教佢做生意，Cammi仲打躉看舖，親自點貨同整理貨架。（新聞連結： http://bit.ly/2advKRd ）前日原來係佢哋拍拖3周年紀念，B先生帶咗Cammi BB去尖沙嘴洲際酒店嘆日本菜，Cammi BB噚日喺Instagram放完佢哋嘅合照後，今日再貼相上微博放閃。相中見到Cammi BB可以對住個維港夜景食飯，更閃嘅係主菜——sorry，唔係啲日本料理，係佢手上嗰隻價值6位數嘅卡地亞腕錶。Cammi BB噚日接受《蘋果》訪問時就話：「唔知價錢，都係一個心意啫，冇特別問，因為係男朋友買嘅，男朋友知我冇錶戴，所以就買隻手錶畀我。」佢仲話平日過時過節，佢哋會互送禮物，但男友平日唔係太識揀禮物：「佢收過風，揀咗粉紅色，我自己都鍾意，佢今次送嘅禮物都幾破費，一年一次」咁唔知佢又送咗啲乜嘢畀男友慶祝anniversary呢？Cammi BB話：「係一個十字架耳環，要買一對（耳環），一隻男朋友戴，另一隻整成吊墜自己戴。」一對價值約5,000，咁相比起嚟……睇嚟B先生對Cammi BB都好大手筆喎！Cammi BB即刻發嬌嗔辯稱：「我有送過Hermès情侶戒指畀男友㗎！」Okay…你話點就點啦…之前提到Cammi BB同男友「合作」做生意，問佢哋係咪夫妻檔上陣時，Cammi BB話過﹕「o依家都算係夫妻檔」，不過，今晚佢又改口。問到Cammi BB打算幾時結婚時，佢話：「想本命年（即3年後）先，男友家人冇催，o依家一半時間喺香港，一半喺廣州黐住男朋友。」Fine，知你哋sweet到惹晒蟻喇……
|
鍾意就快D Share啦！
|
|
|
