有得揀，邊個唔想做美斯吖！衰在球壇就只有一個美斯，就算你贏過美斯，都唔代表你可以好似佢一樣咁搵到錢，又或者係搵到食嘛！今年年初喺世界足球先生頒獎禮上，力壓美斯贏咗個普斯卡斯獎(最佳入球獎)嘅巴西前鋒利拿，人人以為佢攞獎之後就可以平步青雲上位，但世事又點會一帆風順先？
話說利拿之後搵到間巴乙球會維拉諾瓦落班，但踢咗9場都入唔到一球，加上傷患纏身，早排仲搞到畀人哋解約踢走添！踢波難搵食，可以點算？利拿就決定放棄夢想，唔做波神做機神，係打遊戲機個機神，真係估佢唔到喎！
利拿尋日就喺巴西嘅阿萊格里港公布佢以27歲之齡，正式退役！至於佢未來新動向，原來呢位入球聖手除咗踢波有料，其實打機仲堅。事實上，佢喺年初個頒獎禮之後，就曾經同2015《FIFA》系列大賽世界冠軍阿舒利交過手，仲要大勝6比1，真係勁到冇朋友呀！利拿家陣已經搵到商家合作，將會推出自己嘅youtube頻道教打機，同做個職業《FIFA》選手，估唔到踢波出唔到頭，打機都可以殺出新血路，問你服未呀？嗱，我哋仲有片畀大家睇番佢年初個得獎入球片段，就知佢幾堅，不過，以後想睇佢踢波，就唯有上網睇佢打機去和波喇！
SO東波同你追實體壇每個精彩時刻！
http://on.fb.me/1PWMCFH
來源 source: http://hk.on.cc
|
鍾意就快D Share啦！
|
|
|
