「靚聲王」張偉文（Donald）近年深居簡出，上次出席公開場合已是去年八月舉行演唱會的時候，當時被腰患纏繞的他已要以輪椅代步。日前約下午五時，《東網》記者發現他在助手陪伴下搭的士來到尖沙咀美麗華商場，行動不便的他全程要以輪椅代步。當日他身穿輕便裝束，身型明顯比去年消瘦不少，面容略為憔悴，之後兩人搭𨋢到18樓睇骨科醫生。
唔想依賴止痛藥
受訪時講到現時身體情況，Donald一開始先自嘲：「未死得。」之後謂去年五月做了腰錐及骨髓手術：「我尾龍骨第四、五節兩舊生埋一舊，好大塊壓住神經，做咗鑽窿。不過我覺得手術唔係好成功，做手術前可以行三百幾步，但做完手術後只係之前嘅三分一，以前可以企10至15分鐘先麻痺，但依家唔夠5分鐘就麻痺，依家腳痺係直情好似畀針拮咁。如果我依家起身想行路係要練習兩、三個鐘先行到，但之前起身稍為出啲腳力一陣就會行到。」他亦謂不想再依賴食止痛藥：「唔係次次有效，有時食咗可以即刻行，但有時企起身仲係痛，同埋食止痛藥唔會好番，諗諗吓唔對路，所以就嚟睇醫生。」他亦謂手術後曾跌過傷口位兩次，未知這是否跟手術效用有關。
260磅變160磅
講到消瘦不少，Donald即苦笑：「邊開心，邊開胃食嘢？一諗到食會重啲、行得更辛苦就有壓力。」他亦表示現時有160磅：「我最重係260磅，入環星時係230、240磅，之前個30磅係用咗12年時間瘦，但由200磅跌去160磅就係呢兩、三個月暴瘦，不過我戒口都戒得好犀利，我淨係食半嘜米同一嚿餸。」
「怕萬一有事唱唔到」
談及有指他不肯收演唱會歌酬，令人惴測他健康狀況有異，他亦大方承認：「係呀，以前我習慣分三期收歌酬，但今次我同主辦單位講唔收住囉，我唔係唔想做演唱會，只係怕萬一有事唱唔到，不如等我唱完先再一次過收錢啦。」
有傳他10月舉行的香港演唱會將是其「告別作」，他說要視乎身體狀況，不過會樂觀面對病情，Donald說：「我熱愛生命，雖然做完手術嗰陣抱好大希望，最後點知唔係預期咁，但都一直樂觀面對，希望唔會惡化啦。」雖然身體抱恙，但他表示會照常工作開騷，十月會在港舉行幾場演唱會，更有機會到美國演出：「今年對方都接受我坐喺度唱歌，除非我唔唱得。」
|
鍾意就快D Share啦！
|
|
|