掃呢頁CODE去手機

2016年8月11日 星期四

33歲倫敦讀 U 李蘢怡 5A升第二年 [壹週刊 - 1379] __,李蘢怡,M1,

Tiffany最愛設計師YohjiYamamoto的設計,由衫到袋,襯晒!娛樂偵訊33歲倫敦讀U 李蘢怡5A升第二年行過性感,27歲退出娛樂圈的李蘢怡,三年前改名李宜錚轉做珠寶sales,去年更成功考入著名的英國藝術大學,修讀三年設計學位。以5A優異成績升讀第二年的Tiffany,上月返港放暑假,重過校園生活,收起性感,食茶記搭港鐵。過去幾年間,亦不時有人叫她復出,但Tiffany全無衝動。「如果 ...


Tiffany最愛設計師 Yohji Yamamoto的設計,由衫到袋,襯晒!

娛樂偵訊

33歲倫敦讀 U 李蘢怡 5A升第二年

行過性感, 27歲退出娛樂圈的李蘢怡,三年前改名李宜錚轉做珠寶 sales,去年更成功考入著名的英國藝術大學,修讀三年設計學位。以 5A優異成績升讀第二年的 Tiffany,上月返港放暑假,重過校園生活,收起性感,食茶記搭港鐵。

過去幾年間,亦不時有人叫她復出,但 Tiffany全無衝動。

「如果做一件事,又分心去做第二樣嘢,你永遠都唔會做得好!我已經 33歲,啲人成日話你三十幾歲仲讀大學?我覺得自己好幸運,仲有機會選擇!」 Tiffany說。

獨吞一碟炒麵

由性感女神變回樸素學生的李蘢怡,趁在港期間約了昔日的經理人文滌,到西環華星餐廳敍舊。冇見差不多兩年, Tiffany清減了。

昔日是修身界性感中堅,當日打扮卻相當平實,收起 D胸的她,熱捧日本時裝設計師 Yohji Yomamoto,由衫到袋,都係心頭愛。

敍舊大把話題,文滌展示手機內太太及女兒照片晒幸福,其間 Tiffany又攞出一本書,同對方分享內容,邊傾邊食個多小時,獨自在倫敦生活的 Tiffany,「河馬」了一整碟豉油王炒麵,又食蛋撻,對港式茶記美食,特別有胃口。

返港約前經理人食茶記, Tiffany很快報銷整碟炒麵。

Tiffany向文滌推介的《 FAILED IT》,是本教你點將錯誤轉化為成功的勵志書。

Tiffany請客埋單。

理想創自家品牌

同文滌分手後, Tiffany一個人行去坐港鐵,同以前做歌手去邊都有保母車司機接載, Tiffany變得更貼地。在中環站落車,到附近一幢商業大廈內的書店打書釘,專攻設計及繪畫類,又同店員有傾有講,磨了成個鐘才捨得離開。

一○年與星皓電影解約,當時二十七歲的李蘢怡決定回歸平凡,做過 OL,三年前轉職珠寶 sales,日日朝九晚五,又修讀珠寶鑑證、設計等短期課程。熱愛設計,理想是創造自己品牌的 Tiffany,自覺仍有不足。

學生生活簡樸, Tiffany自己砌書櫃,亦會自己下廚。

Tiffany校內兩位好友都是鬼妹仔。

在倫敦生活, Tiffany學曉踩單車。

去年 Tiffany以優異成績,攞到入 U資格,更成功考入現時升讀的「倫敦藝術大學」。

戒蒲專心讀書

去年,立下決心再讀書,並成功考入倫敦藝術大學,修讀三年設計學位,為爭取好成績, Tiffany說自己好少出外消遣,寧願匿埋屋企備課。

「我真係超級緊張,因為係爭取緊一個機會,咁辛苦入到大學,好擔心自己攞唔攞到好成績,我試過因為唔想分心,連好朋友生日都冇出去玩,搞到佢嬲咗我成個學期。」

終於得咗! Tiffany更以 5A優異成績升班。

「話完全唔出去冇人會信,我都會搵機會 relax,但唔會出去蒲囉!仲玩唔夠咩!讀書之後,好多價值觀都唔同咗,呢一刻,我覺得好有滿足感。

「無論做任何嘢,只要係 100%投入,就算最後得唔得到 100%回報,都唔緊要,中間嘅經歷,係會令你人生更精采!」 Tiffany說。

兩年前, Tiffany被發現秘密轉行做 sales,日日 OL打扮返朝九晚五。

去年暑假到峇里旅行,再著三點式晒身材,依然咁索。

復出機會極微

離開娛樂圈六年,其間不斷有人找 Tiffany復出,出騷上節目、拍戲拍電視劇乜都有,全被她拒絕。

「暫時冇諗呢樣嘢!當然我都好開心,有人會同我講,你唔做呢行好嘥!話好欣賞我,係好窩心嘅!但呢啲說話,冇讀書咁實在!」

雖然不再做幕前,但 Tiffany強調自己依然鍾意唱歌跳舞!

「呢兩年,我發現自己其實仲好鍾意唱歌。我覺得唱歌嗰時嘅我,係可以搵到自己,跳舞就可以俾我發揮,對我而家做 design做人方面,好有幫助!不過我諗自己未必會再出番嚟嘞,想唱嘅時候,或者搵個 friend一齊唱吓 K,抒發吓!以前做娛樂圈好被動,而家想為自己做多啲嘢!」 Tiffany說。

買完書, Tiffany一個人去搭港鐵。

當年與 BoBo陳文媛同屬 StarEast旗下。

終極半球

03年李蘢怡被張玉珊睇中,拉隊到法國拍修身廣告。

做模特兒的李蘢怡, 20歲入行,因擁有 36D迫爆身材, 02年被阿叻陳百祥睇中簽約 Stareast, 03年,首次著三點式為張玉珊的「修身堂」拍廣告,魔鬼身材引起公眾極大回響。李蘢怡火速人氣急升,其後一度封胸, 05年與男友分手,自嘲「波大冇腦」的她再次出山,被張玉珊重用,終極露半球,被網民封為性感女神。

家底厚

去年聖誕,媽咪專登到倫敦探她。

為創造自家珠寶品牌,重回校園讀設計的李蘢怡,母親鄭玉而是前仁愛堂主席,後父亦是物業投資老手,單是手上磚頭,已過億。家底厚,李蘢怡大把條件,以達成自己理想為目標。

般咸道麗怡大廈單位 買入: 710萬( 13年)市值: 750萬

羅便臣道賓士花園單位 買入: 838萬( 13年)市值: 950萬

西貢公路八千呎地皮 買入: 3,230萬( 06年)市值: 7,600萬

觀塘興業街中美中心 A座單位 買入: 345萬( 10年)市值: 3,600萬

撰文、攝影、攝錄:娛樂組


鍾意就快D Share啦!