「十優港姐」麥明詩（Louisa）未卸任，已經踩埋電影界，接拍電影《失戀日》，對手「咁橋」又係緋聞男友何浩文，真係好鬼有緣！Louisa亦好老實話，已經有心理準備再傳緋聞，亦唔會擔心「男友」林作會嬲！啱啱喺巴西返嚟香港嘅Louisa，因為實在太忙仲未時間就寨卡問題驗身，但佢嘅拍檔何浩文就「Never mind」，仲隔空出冧招：「我期待畀佢傳染，都係一種經歷！」隔空送「糖水」，相當冤氣！
又孖何浩文合作
麥明詩自當選後，事業發展順暢，好快已經被安排拍王晶重頭劇《賭城群英會》，啱啱去完巴西主持完奧運之後，又去開電影，接演葉念琛電影《失戀日》，而今次Louisa嘅拍檔，又係何浩文！兩人之前拍劇經已傳緋聞，依家麥明詩「第一次」拍電影又係畀咗何浩文，真係不可不信緣！
對於再同何浩文合作，Louisa原來已經有心理準備同對方再傳緋聞，佢話：「都有心理準備，其實劇集上嘅時候，都應該會再傳，冇所謂啦，咪當宣傳。」至於會否擔心「男友」林作唔開心？佢話：「唔會，呢個係工作，我亦冇特別同佢講，只係普通傾偈時講過吓。（有冇得佢批准？）唔需要，反而要經理人批准。」問佢有冇咀戲，Louisa都話未知道，一切等導演安排。
叫林作開戲畀麥明詩
另邊廂，何浩文亦一樣唔怕同Louisa傳緋聞：「冇所謂，大家開心吓啫！」啱啱喺巴西返港嘅Louisa，因為太忙，仲未有時間就寨卡問題去驗身，但何浩文一啲都唔介意，仲向女方投放「愛的閃彈」，指自己好想畀麥明詩傳染，還說：「我好期待佢傳染我，因為我本身畏高，除咗企喺高嘅地方之外，乜都想試吓，令自己人生閱歷豐富啲。」連病都唔介意被對方傳染，真係勁冤氣！問佢擔唔擔心今次又同Louisa合作，會令林作呷醋？何浩文話：「如果合作拍戲都驚有事，咁咪叫佢開套戲畀女朋友拍囉！」
激盪街頭
至於葉念琛繼去年《紀念日》後，今年再拍愛情電影《失戀日》，女主角除咗Louisa，仲有佢嘅愛將鄧麗欣，鄧麗欣繼續演「阿寶」。而電影日前就經已秘密開工，但頭先就好多人都知道佢哋去咗荔枝角拍戲，同何浩文合作無間嘅Louisa，演出相當自然，亦同何浩文更默契十足，喺街上手拖手，真係好似拍緊拖一樣，咁好戲當然拍得相當順利。而因為Louisa嘅T恤相當貼身，令佢豐滿上圍表露無遺，急步行嘅時候，頗為跌盪，相當有搶鏡！
而Louisa同何浩文除咗戲內sweet拍拖之外，戲外亦好好傾，未埋位時常站在一角說說笑笑，感情「蜜蜜」醞釀中！現場所見，鄧麗欣暫未開工，佢嘅舊愛方力申會唔會演出都仲未有定案。而頭先開工嘅仲有鮑起靜、孫慧雪同石修，佢哋都係拍一啲文戲。
|
鍾意就快D Share啦！
|
|
|
