「全部售罄喇，唔好意思﹗」自1966年起經營的咖啡廠，隨一眾街坊不捨聲落幕。店主人稱「肥佬」的鄧國俊售賣咖啡紅茶數十年，每日營營役役，幾乎沒有自己的興趣及生活，不過他毫不後悔，皆因他在此譜出了一段段人情故事。
「功成身退，回鄉耕田」，鄧親自提字貼在櫥窗，當是向街坊交代告別。65歲的鄧國俊，其位於紅磡的咖啡廠主要經營咖啡原材料加工，接手父親的咖啡生意逾30載，他憶述自15歲起就到店內幫忙，打掃、炒咖啡豆、磨豆、配豆、包裝、送貨都一手包辦。
鄧坦言，最初都只是為了「搵食」，但後來就成為了興趣，「呢行好多人唔飲咖啡，我算飲得多。」多年來，店舖一直是「上居下舖」，與咖啡為伴，面對結業，亦不無感受：「都冇咩唔捨得，人生就係咁，唔同時間有唔同嘅目標，以前後面有間戲院，我都未去睇過，依家要補番」，然而當看到居住了多年的家居陳設，即將遷出的鄧亦語帶傷感，不禁哽咽，「咁多年好似冇咗人生，但最慶幸係陪到父母度過最艱難嘅日子。」
「回鄉耕田？佢講笑唧。」鄧太在旁一邊幫忙收拾，一邊笑着解釋。與鄧如何認識？「真係好似拍劇咁，我喺快餐店打工，佢送咖啡粉嚟，咁咪成日見到，每次見都覺得呢個男仔幾好。」當時雙方都不敢做主動，只是默默關注對方，到後來才正式「過電」。「嗰時拍拖嘅節目就係送貨，坐天星小輪周圍去，工作之餘又唔使點使錢，都好浪漫嘅，不過講到底只係苦中作樂。」二人相視而笑，鄧太留下一句：「我哋呢啲叫細水長流。」
小店生意愈來愈少，但所能存積的，是獨特的人情味。店內沒有任何秘方，靠的是多年試咖啡的經驗去不斷改良。他又指，客人會反映應如何改善味道，自己會與客人討論﹔又會替餐廳調配可以放得比較久，沒那麼快變酸的配方。不得不承認經營小店有一定難度，「我哋細舖肯定唔夠大集團競爭，有時攞貨攞得少會俾人睇唔起，但我哋好在實牙實齒，就算無錢開飯都會找數。」
「依家小店已愈來愈少，好似佢哋唔做，以後我就唔知去邊度搵咖啡豆。」光顧了咖啡店30年的鄺先生知悉咖啡廠要結業後，特意到場送別，「我一直都喺呢度買咖啡，講唔出有咩特別，但真係覺得好飲。」可惜，咖啡廠於上周已落幕，大家再無緣一嚐了。
---------------------------------
※ 全新的《myVEGAS Lucky來了》手機遊戲，送你免費演唱會門票、澳門豪華住宿、中環高級食肆套餐！ 免費玩、豪華賞！http://playluc.ky/mvlloncc
|
鍾意就快D Share啦！
|
|
|
