Ryan近年工作量雖不算太多，但不少中學生都能認出他，「你係唔係威煌隊長呀？」三位女學生隨即腼腆地要求合照。
壹盤生意
巨聲幫賣珍珠奶茶 開業三個月 月賺八萬
香港唱片業式微人所共知，明星夢「發吓就算」。當港姐冠軍都要做「魚蛋妹」，不少藝人已面對現實，密鑼緊鼓開店做老闆，用盡知名度彌補娛樂圈僅餘的收入。
○九年參加大台《超級巨聲》的劉威煌（ Ryan），比賽後事業曾順風順水，與許廷鏗等藝人合組「 Super 4」，出商場 show「搵真銀」。但成績漸被隊友追過，許廷鏗簽約做歌星出碟，坤哥更「喊到上紅館」， Ryan卻「愈唱愈霉」，被大台投閒置散，更試過半年幾乎零收入。
他深知演藝圈「有料都未必紅」的道理，早在三年前密謀創業，先後與「巨聲幫」開密室遊戲及音樂教室，全部有錢賺。今年更決定傾盡身家，與拍檔 Stephen以加盟店方式在葵涌廣場蚊型鋪開珍珠奶茶店「清玉」。
由歌手轉到平民商場賣奶茶， Ryan坦言「自己喺呢度大，搵錢最實際」，幸獲老婆全力支持，開業三個月即月賺八萬，更創日賣七百杯紀錄，他揚言：「冇人保證到我演藝事業會點，但喺呢度保證到我日日有工開！」
記者在平日下午到葵涌廣場視察，發現二時多人流十分興旺，媲美不少大型商場假期時間，附近居民及上班族紛紛走進商場覓食，到下午茶時間部分食肆仍要排隊。到了三時多中學下課時間，由於附近學校極多，大量學生湧進商場，人潮到晚上七時仍未有減少跡象。
採訪當天，見 Ryan由運貨到煲茶都不假手他人，之後更到前線收銀，拍檔 Stephen笑指：「鋪頭無假期，佢一有時間就會落場，非常幫得手，唔會話有嘢介意就唔做，仲試過幫手通渠。」現場所見，由於附近有知名度較高、鋪位較大的歇腳亭，生意暫時以對手領先一籌。但當 Ryan負責收銀，明顯吸引途人眼望望，紛紛問：「係唔係上電視嗰個？」更有不少初中生光顧後主動要求與 Ryan合照，可見明星效應有一定作用。
珍珠奶茶雖在港發展多年，早前更受到塑化劑事件影響，但 Ryan稱不怕到「水尾」：「珍珠奶茶的確係有幾年停滯不前，我見呢個牌子講明純天然、唔落化學嘢，喺台灣有自己製茶工場，我覺得有佢嘅競爭力，所以我對前景都係樂觀。我一年最少到台灣兩、三次，咁啱拍檔嘅朋友就喺嗰度傾咗個代理返嚟，問我有冇興趣，我就特登去到台中視察，試過真係覺得好先至決定去馬！」
中學生 Miky就指，該店售價雖然比隔鄰五元一杯飲料貴，但仍覺得值得，「今次揀咗抹香珍珠奶綠，唔算太甜，都幾香茶味。」店鋪標榜用台灣茶葉即場煲煮，絕不使用廉價茶精，記者試過鐵觀音珍珠奶茶，發現茶味的確與其他連鎖店不同，甜度不算太高，但店鋪採用綠色紙杯，看不到喝了多少，而珍珠分量佔近半杯，感覺「愈啜愈有」，整杯喝掉難免有點「頂胃」。
得葵廣得天下
Ryan笑指商場平日時間人流已經算少，笑稱「依家簡直係小兒科」。他直言決定開店時已優先考慮該處，「呢度真係可以講係奇跡之地，我由細喺度大，知道呢度啲人嘅性質，一想掃街就到三樓先，所以二樓有鋪招租我哋都唔要，足足都等咗半年。」
他透露店鋪租金比上一手貴兩成，但仍覺得值得，「基本上葵涌廣場一有放租就有人承接，仲記得嗰晚 agent夜晚打俾我，依家有間鋪話唔做，嗰時要兩個鐘內覆要唔要，我哋諗都唔使諗即刻飛去搞手續！」他指甫開業就試過日賣七百杯，成績比兩間旺角店更佳，「唔夠一分鐘就賣到一杯，喺香港暫時得我哋做到！試過冬瓜茶一日就賣晒一星期嘅貨，成個禮拜都冇得賣，杯都可以用到無，呢度嘅人流真係好恐怖！」
加盟創業有掣肘
由於 Ryan與拍檔均沒有做飲食的經驗，加盟方式的確令他們省去不少功夫，「個品牌喺台灣已經有十年，上年開始喺香港發展，有好多經驗上嘅嘢分享到。」但他認為加盟有利有弊，「規矩一定要跟，簡單至飲管、檸檬，講到明唔可以自己用第二樣代替。所以入貨數量一定要控制得好好，好似香港人偏少糖，同嗰邊講糖比例可唔可以少啲，佢就講一變台灣都要統一，好難就得一間，所以每次都要同客講多聲要唔要少甜。」
由於台灣方面對品質要求甚高，甚至要考試，「裝修晒之後公司會嚟鋪頭試飲，唔 pass就唔俾開，我哋都等咗成個月！」 Ryan直指加盟及裝修費佔了大部分開業成本，「一次過要俾三年加盟費，同埋裝修都指定咗邊間，啲位點放都要跟佢哋，自己搵應該唔使咁貴！」
坐足半年冷板凳
兩年前 Ryan離開 TVB後，隨即跟新的唱片公司簽約，他直言五年間「愈唱愈霉」，「我嗰屆要出位嘅都出晒，我一開始又抗拒拍劇，依家諗番起都幾傻！最可惜就係之前上過內地歌唱比賽後，有唱片公司向我招手，但最後因為 TVB條款關係唔可以簽，我知道未必係公司問題，但係嗰時真係好失望，就決定提前同公司解約。」
他稱以前每個月有幾次「商場 show」，有數萬元收入已十分滿足，但最辛苦莫過於「坐冷板凳」：「啲人問我近排做乜，要答人等緊嘢做，試過幾個月都係咁，我就好驚，所以就即刻決定做生意。」
Ryan結婚近兩年，與太太都經歷過「坐冷板凳」的日子，他感激太太對他的支持，「見我有時喺屋企睇吓電視，做吓自己嘢又一日，佢都想我出多啲街。」對於有指「靠老婆開鋪」，他反駁指：「如果真係，我就唔使喺度賣珍珠奶茶啦。一早同老婆環遊世界，依家要靠自己嘛，我問心無愧就 OK。」
他稱雖早已做好心理準備，歌手賣奶茶會招來閒言閒語，但當真正落場售賣時，難免感到尷尬，「有人同我講，咪幾好囉，腳踏實地。」口吻似叫他「咪再發明星夢」，他坦言心裡感到難受，「我自己都想繼續演藝事業，但係好多嘢我都控制唔到，好彩依家都有唱片公司支持我，依家都習慣喇，最少都有人認得我先」對於會否放棄演藝事業，他就斬釘截鐵地說：「一定唔會，依家叫做 keep住有歌派台，雖然 CD賣一隻蝕一隻，公司都打算幫我出，我兩邊都唔會咁易放棄！」
開業資料（ 05/2016）
租金*：$159,000
裝修及器材：$600,000
品牌加盟費：$245,000
首月入貨：$100,000
其他雜費：$51,000
總投資：$1,155,000
*兩個月按金，一個月上期
營業資料（ 08/2016）
總營業額：$280,000
租金：$53,000
人工*：$53,000
入貨：$80,000
雜費：$14,000
盈利：$80,000
*兩名全職及五名兼職店員，不包括兩位東主
撰文：梁延宇
攝影：關永浩、鄭樹清
攝錄：鄭樹清
ed_bn@nextdigital.com.hk
|
鍾意就快D Share啦！
|
|
|
