張名雅富貴出嫁80萬金器爆晒鈪
前港姐冠軍張名雅昨日與律師男友蔡錦豪（Joe）咀住舉行婚禮，富貴出嫁的名雅連環晒行頭，早上接新娘時她身上掛滿30多隻龍鳳鈪，效果誇張，估計金器已值80萬港元！傍晚名雅換上婚紗戴上三卡求婚戒指及約七位數字珠寶，閃爆全場！被傳有孕的名雅腹部微隆，雖一直避談是否有喜，但笑言：「生幾多個都OK！」
張名雅昨日與律師男友Joe正式拉埋天窗，獲陳庭欣、何傲兒、唐貝詩及何佩珉等組姊妹團陪嫁，早上接新娘及向長輩斟茶環節，富貴出嫁的名雅身穿裙褂，身上有約30多隻龍鳳鈪，兩隻手戴唔晒，要掛在頸上，更有一串大金豬鍊，寓意開枝散葉，估計一身金器已接近80萬港元！
早前名雅下令要錫住老公仔，接新娘儀式禁玩核突遊戲，但眾姊妹依然出動「刑具」，例如包住網的呼拉圈及由傲兒借出的比堅尼，新郎要估中屬於名雅的唇印，否則要被大懲罰！忙完一朝，名雅仍抽空於網上晒合照及多謝大家祝福。
咀足七次
一對新人晚上在尖沙咀洲際酒店舉行婚禮，筵開40席，傍晚約五時，名雅與Joe現身見傳媒，穿婚紗的名雅戴上三卡求婚戒指及六福珠寶贊助約七位數字珠寶，繼續晒強勁行頭！兩人即場化身「接吻魚」，長吻短吻前後錫足七次，名雅更細心幫老公抹去嘴上的唇印。被傳有喜的名雅腹部微隆，她拍照時不期然以花球遮肚，但仍穿上五吋高踭鞋，非常貪靚！
接受訪問時，名雅先多謝朋友及Fans送上祝福，直言非常開心，講到接新娘，她說：「我喺房度，但何佩珉好好，幫我拍片，睇住出面好搞笑！（叫姊妹錫住老公？）都有，但點都要玩，都幾開心！有個難關係考番我哋以前啲嘢，以為考到佢，點知佢識答。」問是否有孕？名雅不肯透露：「今日係開心結婚。（未講得？）唔講喇！總之今日大家恭喜我新婚快樂（你仲着高踭鞋喎！）係呀！所以都要扶實老公。」問到想生多少個小孩？Joe笑說：「未計劃，我哋都鍾意小朋友，愈多愈好。」名雅說：「大家要夾吓，幾多個都OK，父母冇畀壓力，有小朋友就開心，佢哋會幫手湊。」
傳統送金
講到婚禮的特別安排，Joe表示以溫馨為主，問有否驚喜送老婆？他說：「有，但唔話得畀大家聽，講咗就唔驚喜。」至於相識經過及求婚過程，他們都不願多談，名雅說：「總之識咗一段時間，唔係一識就拍拖，了解過，我哋思想傳統，啱先一齊。（拍咗幾耐拖？）唔講喇！畀啲空間我。」
提到名雅出動超誇張金器，她笑言有約30多隻金鈪：「長輩好錫我哋，對我哋好好，有送金鈪，我哋都傳統，有戴金豬。」Joe表示其親戚較多，感激他們厚愛，對於被網民指感覺土豪，名雅稱只是跟傳統習俗：「要戴金着褂，我夜晚仲要戴上身，條頸好重，仲要戴豬牌。（父母送咩？）都係金、鑽石耳環、紅色篋畀我帶去男家。」她稱婚後會返溫哥華跟父親當地親戚食飯，約逗留個多星期，度蜜月地點尚未決定。
晚宴上，名雅戴上當年贏得的港姐后冠進場，與Joe上台深情錫錫，獲全場掌聲，名雅多謝父母時更感動得爆喊：「爹哋媽咪冇縱我，佢哋教我做個好人，貢獻社會，愛錫身邊人，好多謝佢哋，我會向奶奶同媽咪學習，好好照顧屋企，同愛錫老公。」
文：影視組
|
鍾意就快D Share啦！
|
|
|
