鄭紹康忽然指蘇永康有新劇，言語間似有所暗示。
日前徐濠縈在Instagram私人戶口上載與剛出院的陳子聰及何超儀合照，但相片被流出，事後阿徐聲稱是被出賣，歌手蘇永康昨日在活動上暗示阿徐經理人兼公關鄭紹康牽涉其中，又指對方曾以3,000港元邀請自己出席活動，感覺受侮辱。
今日鄭紹康由內地返港現身活動，問到有否跟蘇永康溝通？他說：「未溝通，但好多謝世界各地嘅朋友傳短訊慰問我。（蘇永康事後話相片事件係一場誤會？）我真係冇做過，我冇阿徐私人戶口，我好開心件事水落石出，算啦件事過咗去。（要佢道歉？）我哋move on。（因為三千蚊結怨？）係好耐之前嘅事，已經係幾年前，幾多錢我真係唔記得，如果佢為咗咁耐嘅事而唔開心，心裏面有條刺，我真係好遺憾，有好多嘢唔係淨係錢，有時係錢加埋其他優惠或禮物，唔同性質唔同日子，出場價都唔同。（佢話自己喺你心目中只係值三千？）唔會，每日有唔同價。（佢嗰日嘅價只值三千？）我冇咁講過。（你哋有私人恩怨？）清者自清。（以後會唔會再搵佢出活動？）呢個世界係緣，緣份個緣。（佢話你唔使關照佢？）隨緣。我想講作為一個負責任嘅公關，我係以客為本。（佢話太太都好熟知行情）依家唔係最輝煌年代。（會唔會搵中間人傾吓？）未諗呢啲。我有同阿徐溝通過，最緊要佢知唔係我。（擺和頭酒？）好呀！尋日都有律師打電話畀我，我未仔細研究，未諗到呢個問題。（唔排除採取法律行動？）要傾吓先，我係唔開心，因為對我誠信有問題（指影響）。（你有咩同佢講？）有人同我講佢嚟緊有劇，祝佢新劇收視高開。（佢乘機宣傳？）我冇講過。（時間太巧合？）我唔知。（再見尷唔尷尬？）睇情況，現場咁多人，想見都未必見到。」
來源 source: http://hk.on.cc
|
鍾意就快D Share啦！
|
|
|
