鍾淑慧吳岱融 大馬睇3千呎豪宅
57歲的吳岱融憑劇集《巨輪II》扮獸父人氣翻生，據知僅短短個多月，已密密接4部電影及多個商演，吸金七位數字，前日吳岱融和老婆鍾淑慧現身馬來西亞，兩人恩愛拍拖睇3,000呎豪宅樓盤，退隱多年的人妻鍾淑慧，雖然年屆47歲仍風采依然，她昨表示不怕老公有女黐埋身：「做好自己，希望佢唔好走囉！」
【親睇樓盤】
■吳岱融和鍾淑慧前日現身馬來西亞睇豪宅樓盤，並獲專人講解，據知兩人睇中一個3千呎豪宅。
新加坡小生吳岱融於80年代憑劇集《絕代雙驕》、《邊城浪子》在港走紅，現變中佬的他早前復出拍劇集《巨輪II》，扮獸父高天鷲向養女陳凱琳施暴，因演技夠奸超高班被激讚。據知，人氣反彈的他食住個勢狂吸金，除拍網劇《反黑》與陳小春合作外，更一口氣接了4部電影，加埋商演賺逾七位數字；前日，有人見到吳岱融孖老婆鍾淑慧現身馬來西亞睇樓盤，似乎想做業主買安樂窩。
【2000年索爆】
■16年前的鍾淑慧又靚又索，一雙長腿殺死人。
【仔細研究】
■兩夫婦細心睇樓盤模型。
入地盤睇樓吳岱融和鍾淑慧前日雙雙現身大馬新山睇豪宅樓盤，在劇集型爆的吳岱融做回平凡人，着恤衫孭斜孭袋，鍾淑慧就戴漸變太陽眼鏡着V領闊身衫，47歲素顏的她樣子依然清秀省鏡，兩人打扮低調拍拖睇樓盤，並拿着售樓書，由專人接待睇示範單位。他們跟其他人一樣要除鞋入內參觀，沒有因藝人身份獲額外通融，示範單位分別有大廈和屋苑格式，二人睇得好細心，之後更戴安全帽到地盤視察現場環境。
據知，鍾淑慧和老公睇中一個近3,000呎單位，樓價大約700萬港元，因為吳岱融是新加坡人，更曾被封新加坡第一帥哥，兩人的獨子Justin現於當地服兵役，難怪想在極接近新加坡的大馬新山買安樂窩！
昨日記者致電向鍾淑慧求證是否在馬來西亞買樓？身在新加坡的她說：「冇呀，因為我哋有啲朋友買咗，知我哋過咗嚟，特登帶我哋去睇吓，我哋都想去八吓箒，咁當然都係有興趣嘅，咪睇吓囉。」問到吳岱融狂賺七位數字？她口密封嘴：「錢銀方面我諗你問番佢好啲囉，我唔係好清楚呀！」
【豪華巨廳】
■吳岱融對豪宅的示範單位巨廳似乎好滿意。
【實地視察】
■吳岱融（左二）和鍾淑慧戴安全帽，親身去地盤視察環境。
■吳岱融於《巨輪II》向養女陳凱琳施暴演出被網友熱議，成功翻身。資料圖片
■吳岱融和鍾淑慧的兒子Justin現於新加坡服兵役，難怪想在鄰近的大馬置安樂窩。資料圖片
等緊好劇本
老公越變越型，問怕不怕有女埋身？鍾淑慧笑說：「呢啲冇得驚噃，做好自己囉，希望佢唔好走囉。」再問有否興趣復出拍戲？鍾淑慧坦言：「都唔係話興唔興趣，其實自己係一個演員，一直好渴望好角色或好劇本，希望有份參與，但anyway我相信大前提，等我收咗身先再算啦，哈哈哈！」
當年吳岱融和鍾淑慧合作拍三級片《替天行道之殺兄》，挑戰三級極限裸露全相晒「鵰」，而鍾淑慧93年拍《滅門慘案之孽殺》被扮養父的何家駒強暴露兩點，因大膽演出震驚影圈，想不到23年後，老公吳岱融在《巨輪II》因姦養女的劇情上位。吳岱融和鍾淑慧結婚多年，感情經得起時間考驗，雖傳吳岱融曾受誘惑，但最終都是雨過天晴，而兒子Justin於本月底就滿19歲。
採訪：魯吉
|
鍾意就快D Share啦！
|
|
|
