私人空間不足的確引申唔少問題，時鐘酒店就成為好多人解決性需要嘅不二之選。
講到時鐘酒店，經營三間時鐘酒店，入行七年嘅老闆歐生向記者表示，「以我在職嘅時間，其實係七年前八年前，以我認知嘅時間呢都係好旺嘅。有啲房平均可能係90蚊一個鐘，淨係一個上晝，朝早九點到夜晚九點，佢就已經做到有五千蚊鬆啲嘅時鐘費，90蚊一間其實都好犀利下。」佢又話以前時鐘酒店仲會同夜總會合作做生意添!
問到租時鐘嘅咩人比較多，歐生表示:「冇特定限制，咩人都可能，其實有啲拍拖嘅，可能冇咩地方去，想有啲私人空間，又想休息下，都冇分邊一啲人較多。如果佢係想休息一陣，咁唔單止係年青人，可能五十幾六十歲都會有。」
歐生又指係大時大節會出現「爆房」情況，「假設佢係租咗全日嘅，Stay係香港兩三日，咁佢由朝到黑都喺間房度，咁你塞爆咗間房，譬如有十幾間房，啲人上嚟時租，咁就通常真係會冇啦!」
雖然去時鐘酒店唔係奇怪嘅事，但原來年輕人對時鐘酒店有唔同嘅睇法，何小姐就話:「其實我覺得一直以嚟好多青少年都係跟父母住，即係如果你話要解決性需要，佢哋都要自己諗地方，所以我覺得以前同而家都係差唔多，不過認真講嘅話而家樓價係貴嘅。相對以前嘅話，冇咁快上到樓。」
至於吳先生就表示有聽過時鐘酒店要排隊，不過就未試過走去幫襯，但佢補充如果有需要都會考慮下。
另外，情侶李先生同女朋友殷小姐都話冇去過時鐘酒店，好「忍得」嘅李生仲話:「等去旅行囉!等下囉。」至於會唔會考慮去幫襯呢?李生就話:「唔會呀，我覺得好似好唔衛生。」
撰文:何紫
攝影:金文、韋平
|
鍾意就快D Share啦！
|
|
|
