慶幸老公戰勝死神 超儀寸阿徐多手洩密照「佢有分享症」
相識逾20年的好姊妹何超儀與徐濠縈，近日傳因超儀不滿阿徐將她老公陳子聰大病初癒照片放上社交網而反目。雖然阿徐矢口否認，但昨日有報道指超儀承認照片外洩後已沒跟阿徐聯絡，又表示沒想過一張相片也被人利用。昨日超儀出席活動時，表示慶幸老公戰勝死神。對於與阿徐割席傳聞，超儀寸爆阿徐手多上載相片：「佢真係有分享症。」
■何超儀昨日被問及與徐濠縈反目一事，她指已原諒對方，但雙方甚少聯絡。
■超儀（中）昨日為化妝品牌開幕任嘉賓。
■有指何超瓊（右）下令超儀禁止阿徐再探望陳子聰。
■阿徐（右）早前將陳子聰病癒相放上Ig，有傳相片外洩令姊妹反目。
賭王女婿陳子聰月前因腸胃問題入院做手術，並因病而體重急跌。雖然超儀對老公病情一直保持低調，但好姊妹徐濠縈卻將陳子聰大病初癒照片放上Ig，盛傳超儀為此極度不滿，與阿徐反目。
日前阿徐被問到超儀因照片外洩而跟她反目時，阿徐加以否認，揚言仍有跟超儀聯絡。不過，昨日有周刊指陳子聰照片外洩後，超儀遭老爺奶奶及胞姊何超瓊指摘，超瓊並下令超儀禁阿徐再探訪。另外，陳子聰出院後休養的新地址又被曝光，由於地方僅得阿徐等幾個朋友知道，接二連三事件令超儀起疑。事後超儀受訪時，自爆再沒跟阿徐聯絡，揚言沒想過一張照片也被人利用。
■超儀早前多次出入醫院探陳子聰，她昨指老公已戰勝死神。資料圖片
■超儀昨日寸阿徐（右）有「分享症」，愛在社交網貼相。資料圖片
「出頭髮靚仔番」超儀昨日現身又一城出席化妝品牌NARS新店開幕禮，說到老公健康狀況時，她笑說：「𠵱家老公身體好好，肥番少少。𠵱家日日都買好嘢佢食，執番條命梗要食番好啲。佢出番頭髮，成個靚仔番，好似出道時做model咁弗，如果build up番啲肌肉就推佢返出嚟做model，𠵱家佢好似筋肉人咁。老公好叻，戰勝咗死神。」
超儀在外洩照片中變成佈景板，問她是否介意時，她說：「我同老公都唔介意朋友post嘢分享，但我哋立場係分享喜悅，真係唔明白阿徐點解會俾人偷咗相。」可覺得被人出賣？她說：「唔識答係咪俾人出賣，大家都要放過阿徐，佢可能錯手㩒咗箒，大家知佢出嚟食飯連啲菜都要影，佢真係有分享症。」
「好憎Post相上網」問超儀可覺不受尊重？她謂：「有少少唔小心咗，佢打咗嚟耍冧，都原諒咗佢。」會否下令朋友不要再影相放上網？她說：「都唔係第一次，朋友嚟屋企玩都有叫佢哋唔好影相，因為我唔鍾意影相，好憎佢哋post上網，互聯網唔可以相信。」超儀否認超瓊下令禁阿徐再探訪陳子聰，指家人只是不想探訪時惹來傳媒關注。
問陳子聰是否介意近照被公開時，超儀謂：「我同老公都好無奈，估到佢係隨便咁post，多手咗。」跟阿徐是否仍是朋友？她笑謂：「我哋一夜係姊妹，一世都係姊妹。」有否跟阿徐聯絡？她說：「其實一直比較少，因為近來老公件事先至多咗聯絡，因為各有各忙，都少咗聯絡，朋友聚會都好少。」記者昨日曾致電阿徐，但截稿前未獲回覆，至晚上她繼續在Ig貼相，原來她在上海為馬拉松練跑。
採訪：羅慧敏
攝影：陳俊強
|
鍾意就快D Share啦！
|
|
|