繼周柏豪、天心、孫慧雪、Race之後，又有喜事喇！吳日言（Yan）同男友（Barry）愛情長跑17年，上個月27號終於跑到終點，仲手拖手去咗日本沖繩註冊結婚，認真恭喜！雖然Yan將消息密冚，但《蘋果》一樣收到消息，仲有讀者提供咗幾張，話喺沖繩座喜味城影結婚相嘅時候，咁啱撞到一樣都係影結婚相嘅Yan，而當時Yan見到疑似港人都眼望望，相當小心。而《蘋果》即刻打俾Yan求證，佢初初猛問記者點解咁問，然後都大方承認話：「我已經做咗人妻喇！」Yan又話，其實唔係刻意保密，只係想做好心理準備先宣佈，又講笑話本來想過咗農曆新年，逗多一年利是先至講。佢哈哈笑咁話：「其實男友今年1月已經求咗婚，一直保密冇同人講，今次去沖繩就安排咗幾個月，我哋係喺10月27日註冊嘅！」問到佢點解揀去沖繩結婚？Yan就話：「好鍾意呢個地方，八、九年前經過一啲教堂好靚，所以都有幻想喺呢度舉行。好多人都只係去行禮，但我自己喺埋嗰邊註冊。老公之前都有問我，話日本的婚姻法例無香港咁保障女姓嘅，問我介唔介意，咁我自己考慮過都冇所謂。」佢又話今次出席婚禮約有30人，全部係親戚同舊同學，因為大家朋友都係以前同學，圈中人反而一個都冇講，笑言：「初初仲諗住慳番農曆年封利是，睇怕o依家都冇得慳喇！」問Yan結婚當日有冇變喊包？佢話：「少少最尾同老公講，我以前未必係一個好好嘅女朋友，但將來會係一個好妻子，都忍唔住喊，同埋嗰日心情好緊張，因為自己真係要嫁人，行禮嗰時要爸爸將我頭紗擺好，然後挽住爸一齊行入去，自己出唔到聲，忍住唔喊。」
|
鍾意就快D Share啦！
|
|
|
