【東方日報專訊】現年34歲的「宅男女神」孫慧雪被揭8月底入紙排期，與圈外有米男友Edwin申請結婚，三個月「限期」已到，雪雪榮升人妻！兩人將於下月23日在愉景灣辦婚禮，雪雪透露Edwin趁她生日送上小魚仙氣球及戒指求婚，令她喊住應承！ 「宅男女神」孫慧雪與年長兩歲的圈外有米男友Edwin Lo拍拖約四年，年中分手又復合，恩愛程度更勝從前！雪雪近月出席活動時多番表示想嫁，原來她與Edwin八月底已秘密入紙排期申請結婚，兩人報稱地址相同，同居於北角。
低調處理唔鋪張
據知兩人將於下月23日在愉景灣行禮及擺酒，但雪雪及家人都不想鋪張，故沒有廣邀賓客。雪雪昨日接受本報電話訪問時承認婚事，表示本打算婚禮結束後、平安夜才宣布喜訊：「多謝大家祝福！本來心情都唔緊張，依家突然有啲緊張，同埋意識到日子愈來愈近，但我帖都未派！」她對Edwin讚不絕口，冧爆說：「佢心地善良，對我同嫲嫲都好好，而且我哋好夾，都鍾意公仔同動物！」
她透露Edwin在她生日當天（7月11日）求婚，過程Sweet爆：「佢喺迪士尼Book咗間房，一早布置好，我入去佢就話要求婚，我以為講笑，但望到氣球寫住Marry me，同埋有個氣球係我最鍾意嘅小魚仙攬住隻戒指，我就喊咗出嚟，應承咗！（事業升呢先結婚？）我覺得對身邊人都要負責任，唔可以只為自己工作，打亂另一半人生計劃，組織家庭都係我想做嘅事，咁人生先會圓滿，我年紀都唔細！真正支持我嘅人見到我幸福會祝福！」
「我仍然屬於大家」
提到需於入紙3個月內註冊，是否已註冊成為人妻？雪雪未有正面回應，只說：「我當行禮嗰日先係我嘅大日子！」但相信已完成註冊程序，宅男女神變成人妻！昨日傍晚，雪雪公開與Edwin的婚照，並留言感謝各界祝福，但不忘搞笑：「我仍然是屬於大家的。」入行10年的雪雪默默耕耘，今年憑寫真集晒33C身材火速彈起，拍劇所佔戲份愈來愈多，如今可謂事業愛情兩得意！
文：影視組
是日精選
|
鍾意就快D Share啦！
|
|
|
