無綫小生陳展鵬與緋聞女友胡定欣再度合作拍劇，卻先後受傷！定欣早前不慎弄傷腳，而展鵬今日拍攝動作戲時傷及耳朵流血不止，要入院縫針兼停工，二人原定日內拍攝接吻戲亦惟有暫時告吹。
今日凌晨時分，定欣與展鵬齊齊開工拍攝打鬥戲，一度傳出展鵬耳朵受傷流血不止，更要送院縫六針，暫時須停工休息兩天，令劇組擔心不已。
流出多個受傷版本
展鵬受傷原因傳出多個不同版本，有指他與定欣對打時，定欣不慎扯甩其耳環，惟展鵬接受電話訪問時卻表示：「出咗院，邊有咁誇張呀！唔關定欣事，唔係好嚴重啫！唔緊要，男人有疤型啲呀！其實係我打觔斗時唔小心撼咗埋枱角受傷，醫生建議縫針好啲，監製就叫我休息兩日，多謝大家關心！」他下午更如常外出做運動，精神狀態似乎不錯，但見他戴上耳機遮住「傷耳」，似乎是想減低細菌感染機會。
稱同定欣有默契
展鵬坦言新劇動作場面危險度較《城寨英雄》更高，他說：「今次又刀又槍，同埋要打巴西柔術，傷頸及傷骹機會較高，作為演員知道觀眾鍾意睇，梗係想繼續拍其實開鏡到依家我都親身上陣冇用替身，拍出嚟好睇嘛！（就住定欣嚟拍？）我哋默契一定要好好，一定要知力度喺邊！」
求停廠保平安？
見完紅自然要「攞彩」，問到是否有信心台慶再奪視帝？他笑說：「講講吓，會唔會係因為我喺新加坡攞完視帝，返嚟未有時間請大家食飯，所以要我出血呢？不如停一日廠，等我有時間請餐飯，為大家買個平安」
監製叫定欣負責任
至於監製文偉鴻受訪時表示「案發」時並不在場，事後從工作人員口中得知事件，並謂：「佢兩個都係『塘水滾塘魚』喇！佢哋對打戲好多，巴西柔術又要互相扭鬥，嚟緊應該要改改啲動作設計，再整親受傷就唔好」他又透露原定明天拍攝定欣與展鵬一場重頭戲，安排二人打出真感情繼而接吻，但如今相信要暫時告吹，他笑說：「總之呢場戲開唔到，定欣要對展鵬『負責任』囉！」
定欣今晚亦有在微博「呵番」展鵬，留言：「你要好好休息，快點好番，放心……我會幫你請過一個保鏢，以後我就負責斟茶遞水買飯，想食咩，即管開聲……」Sweet到咁，相信展鵬雖然受傷，都必定甜在心頭！
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
