【新增影片】
大劉劉鑾雄近期身體狀況一直欠佳，患有腎衰竭、糖尿病等，今日大劉喺多份報章刊登聲明，撇清同知己呂麗君嘅關係，亦交代先後俾咗廿億呂麗君，而且大劉會盡父親嘅責任，照顧同呂麗君所生嘅囡囡秀盈、囝囝子鋒嘅生活費云云，不過外界傳係有人迫大劉出聲明。大劉罕有接受《蘋果》專訪澄清冇被迫出聲明，佢話：「你睇我個樣似唔似俾人禁錮？而且公司好多同事都直接搵到我，包括我啲妹、細佬，好多人都知我去咗邊。」講到大劉嘅身體狀況，佢直認已經精神好好多，佢亦直認已換腎；被問到今次出呢個聲明其實對呂麗君有咩不滿，呂麗君媽咪又出嚟話大劉受甘比影響，又話甘比成日求神問卜？大劉直言：「如果求神問卜，就係呂麗君，我同甘比都唔係信呢啲嘢嘅人，唔做啲旁門左道嘅邪門術，我識甘比十幾年，佢從來冇要求我買任何禮物，或要錢嘅，反而呂麗君就用不同嘅藉口嚟攞錢，攞極都唔夠。」、「佢同佢媽講到甘比求神問卜，要我遠離煩擾我嘅人，最煩擾我嘅人就係佢囉。」有傳大劉被禁錮，大劉強調：「呢啲係佢哋夾硬講，所以佢哋講嘅嘢，從來未發生過喺我身上，甘比從來都唔會咁。」覺唔覺得甘比受咗好多冤屈，大劉直言：「平時佢(呂麗君)講嗰啲嘢，全部都係佢做，唔係甘比做。有時呢，佢都好想出嚟做嘢、講嘢，但係我話，算算俾面我，始終家醜不出外傳，但呢次真係忍冇可忍，我發現到呢，我越唔出聲，我忍一步，佢就迫一步。」佢又話自己思路清晰：「我噚日先打咗六個鐘頭牌，即係你睇吓我個樣，似唔似傻更更，似唔似神智不清，即係佢(呂麗君)唔知，完全唔知，因為連我去換腎佢都唔知，咁你話大家咩關係？」大劉又指自己患病嘅時間，百分之一百係甘比照顧，佢仲話呂麗君喺佢病咗年半時，佢稱：「佢(呂麗君)去過一次醫院，逗留咗10分鐘就走咗，跟住我入咗醫院幾廿次，一次都冇出現過。」大劉仲話對呂麗君已死心：「我不嬲十幾年都對佢心死，你諗吓佢可以成日去第二度，我唔知佢做乜嘢，唔見咗幾日，我都唔出聲，我唔係睇著一對仔女嘅份上，一早已經pan佢走。」佢又暗指：「我成日都講你就算俾1百億佢，佢為1蚊去出賣我，你就算俾1百億、2百億，冇用嘅，佢永遠貪得無厭。」
|
鍾意就快D Share啦！
|
|
|
