ViuTV選美節目《美選D.n.A.》，一直被視為大熱冠軍嘅巨胸翠如鄧月平(Larine)同張沛樂(沙律)，由初賽鬥到決賽，二人近日亦順利殺入12強，喺下個月18號爭奪后冠。雖然未知邊個最終攞冠軍，不過18歲巨胸翠如Larine中途已經有意外斬獲，俾阿旦鄭丹瑞睇中拍新戲《小男人週記3之吾家有喜》(新聞連結：http://bit.ly/2gd56Xt )Larine憑35F「胸」器所向披靡，但同樣因為澎湃身材，童年時受到同學欺凌甚至非禮。日前Larine接受《蘋果》訪問時，憶述童年經歷時，就話：「其實小學嗰陣已經發育，到中一時已經開始有啲聲音，話我返學做乜要加墊喺個胸度，小息又會有一大堆男仔企喺門口指住我，放學嗰陣又俾人攔截，試過有男同學問可唔可以俾佢摸一下……」「之後佢哋開始變本加厲，小息或者放lunch，我個書包啲書都會俾人整濕晒，上堂嗰陣又會剝咗我隻鞋，仲試過有次我喺操場，佢哋釣隻青蛙落嚟……我想講，喺呢個年代，學校欺凌真係好嚴重，講出嚟係想社會關注吓呢個問題！」喺學校惶恐度日，Larine有日Lunch Time終於頂唔順，喊住跑返屋企，同阿媽講：「我一係唔返學，一係返學校吊頸死！」Larine媽見事態嚴重，立即搵社工安排Larine見心理醫生。「見心理醫生前，我已經連續兩個月失眠，媽咪好錫我，但有好多嘢你需要自己一個去面對！」最後令Larine徹底醫好情緒病，唔係醫生亦唔係靠藥物，反而係麥浚龍嘅電影《殭屍》。Larine話：「睇《殭屍》係我病得最重嗰陣，呢套戲最尾係叫人放下，睇完好似成個人開竅，所以Juno係我偶像嚟！」
| 攝影：陳順禎 | | |
| | | |
| | |
|
鍾意就快D Share啦！
|
|
|
