【新增回應】鄧萃雯喺2013年因為《金枝慾孽貳》收視低而公開炮轟無綫飛紙仔，繼而激嬲編劇周旭明及演員黃德斌，最後遭封殺嘅鄧萃雯，今晚現身無綫，與黎耀祥一齊頒發最佳劇集，似乎雙方關係正式破冰。(新聞連結： http://bit.ly/2gZymo9 )兩個老拍擋碰頭，祥仔公開邀請雯女回歸拍劇，兩人台上對話精彩搞笑，祥仔話：「我哋都識咗好耐，只係拍檔過兩次，兩次都攞獎，之後就冇再繼續做拍檔，幾時再返嚟做拍檔先，個個希望喺熒光幕上見到你！」結果全場歡呼，祥仔仲話o依家有好多小鮮肉㗎！雯女聞言大笑：「有小鮮肉咩？」祥仔充當高層身份，問雯女返無綫拍劇要乜要求？雯女好直接話要錢，祥仔話：「錢呢個問題我哋無綫不嬲唔講，從來都係講心，你放心，我知你搵開人仔，但人仔呢排同港紙一對一，應該冇問題。」祥仔問咁除咗錢仲有咩要求？雯女話：「我要好劇本，有一樣大家都知，我唔要飛紙仔，一定唔得。」祥仔即話：「你放心，飛紙仔嗰個炒咗，走咗，唔使擔心，我可以幫你篩選。」雯女即笑祥仔係高層，祥仔笑言自己係扮高層，跟住雯女就話要求夠時間瞓，女人要靚，又高清：「要公平啲，我出面工作十二個鐘連化妝，無綫呢樣十四鐘都得。」祥仔話要安排下，近排都拍到放早餐，全場好有人拍掌笑，祥仔話當雯女應承回巢，仲講笑話叫餐廳唔好開早餐，橫掂都冇得放，雯女話：「應該拍住我拍，我一定唔會咁樣拍。」祥仔叫雯女聽日返來簽約，雯女就話：「唔怪得個個問我，係咪返嚟拍劇！」雯女事後接受《蘋果》訪問，佢透過whatsapp回覆：「我和TVB關係其實一直不差，公司也有找我回去幫手，還希望度身訂造以表誠意，只是期撞了和未遇到啱劇本！」
|
鍾意就快D Share啦！
|
|
|
