十年前有一日，當時飛往美國做《超人》續集電影訪問嘅李潤庭，做完訪問由LA返港途中無無聊聊，喺飛機上搵嘢食。見到有個靚靚直空姐Crystal經過，李潤庭就借機呃水吹，問佢：「有冇杯麵呀！」對方有啲寸反問「你係咪要？」李潤庭不甘示弱答一句：「問吓啫！」就係咁，李潤庭同Crystal交換電郵，開始約會。拍拖五年，Crystal成為佢老婆。2010年，李潤庭帶埋燈牌「係咪有杯麵呀！」去機場接Crystal，然後於機場跪地送上鑽戒求婚。嗰陣李潤庭仲係有線娛樂台主持，2011年11月24日假座W酒店筵開25席娶妻，一眾主持包括陸浩、區永權、衛志豪、鄭文、余思敏、劉明軒、莫家鑑、史澤雅、黃曉君、黃翠如、梁嘉琪、黃子俊等等都有到賀，而與李潤庭是好友又是死黨的倪啓瑞則出任他的伴郎。當時李潤庭大讚老婆，話對方係「滿分有找」，又稱其心地好EQ高，啱啱彌補到佢嘅躁底，仲話Crystal令佢有無窮無盡嘅話題，每日都好開心。相處10年，如今李潤庭背妻偷食斷到正一正，更被揭依家嘅李潤庭，對妻子已經不似惜日咁好傾。據報道指，呢幾個月李潤庭動輒同老婆嗌交，或者唔瞅唔啋，冇乜好面色對方睇。李潤庭話過，做呢行，有時收咗工，真係攰到唔想講嘢。其實問題只係爭在，對象係邊個。
來源 source: http://s.nextmedia.com
|
鍾意就快D Share啦！
|
|
|
