名人動態
馬天佑贏盡女人心
現年 28歲的馬天佑，圈中人習慣稱呼他馬佑，是近年香港最快冒起的星級形象指導，合作過的藝人名人遍及中、港、台；何超蓮為他一句話，寧願跌損手、識於微時的阿 Sa蔡卓妍對他百分百信任、內地天后范冰冰更欽點他改頭換面。
14年在 London College of Fashion畢業，以為含住金鎖匙的馬佑不愁錢，原來畢業後信用卡被停用，攞住萬多元的他，膽粗粗做老闆，短短四年，公司極速擴充，員工由三個增加到二十二個。
自己摸出一條路，不放過任何一個機會的馬佑說在每個合作過的人身上，都學到嘢。
何超蓮 為他跌損手
阿 Sa 義無反顧信任
范冰冰 欽點大改造
大學畢業被停卡
馬佑依從塔羅師意見，畢業後創業做老闆，開公司幫藝人名人做形象，成功打入娛圈，跟吳千語、阿 Sa，賭王三房千金何超蓮等成為好朋友；今年生日，超蓮更親手為他整蛋糕。
有人氣自然有生意，瓣數愈來愈多，再開第二間公司，負責製作、市場推廣以及推出自家設計品牌街頭衫「 SUGAR005」。
「我好好彩，好多機會飛埋嚟！所以我會用盡時間去把握，好多人以為我做 styling唔需要返 office，其實我有返工時間，每日要開好多會，唔係淨係借衫俾 artist著，有好多準備功夫要做。」馬佑說。
父親做生意和兩個哥哥做 ibank，大學畢業前馬佑收到通知，附屬卡將被停用，要開始自力更生，於是他攞住一萬蚊開檔。
「我當時係膽大心細，但都知道開始做呢樣嘢，大概會有啲咩 job。其實我計過數，如無意外，夠錢出糧俾同事。」
未正式打真軍，馬佑做暑期工已儲落唔少可以「幫到手」的人脈網，因為他先後做過英皇、東亞以及留在台灣三個月幫金牌大風執頭執尾斟茶遞水。
阿 Sa識於微時
識於微時的阿 Sa，找他做唱片《 Blooming》封套形象指導。
「大學一年班我喺英皇做暑期工，嗰時阿 Sa對我態度同而家一樣，冇因為我嚟做暑期工唔理我，係好真好真嘅人。之前同佢喺英國影唱片封套，當時啲歌未錄好，我哋只係諗好畫面，用薰衣草田同太陽花田做背景。
「喺一個咁特別嘅地方，我提議阿 Sa換新形象，將頭髮染大紅色，佢諗咗一陣就應承我；不過隔咗幾日，佢又將頭髮染番之前嘅顏色，原來佢要連戲。阿 Sa就係咁信任自己團隊，所以抵佢有今日。我喺佢身上學到好多，佢教識我好多嘢。」
超蓮跌倒大叫
一三年，第一次與何家千金何超蓮合作，也令馬佑看到富二代未被發掘的真實一面。
「當時係做慈善相展，第一個就影超蓮，我借咗全亞洲得一件嘅 Burberry trench coat，千叮萬囑佢唔好整污糟；影相嗰日佢著住一對好高嘅鞋，影影吓突然仆親，佢驚到大叫，但為咗唔整污糟件衫，佢用手撐住地下，件衫冇事，超蓮反而有少少擦傷。」馬佑說，對何超蓮的投入和責任心大開眼界。
范冰冰自動波配合
上位快，但機會只留給肯用心和準備充足的人。馬佑記得有次應邀飛北京幫一本雜誌為范冰冰造型，同日有八間傳媒在輪候，每間半個鐘，馬佑當場決定放棄原有的構思。
不過，當范冰冰看見他搜羅自不同國家的 props，即自動提出配合，多給他四個小時。
「嗰次時間好趕，之前我只有一星期做準備，但都盡量拜託朋友喺唔同地方寄 props俾我，范冰冰睇見啲 props，覺得好有興趣，仲主動改髮型同化妝配合；佢嘅反應，俾咗我好大鼓勵，做嘢最緊要有心，無論人哋接唔接受，自己 at least要有誠意，為人哋諗多一步，唔好驚蝕底。」馬佑說。
撰文、攝影、攝錄：娛樂組
|
鍾意就快D Share啦！
|
|
|
