熱爆娛樂: 肯加監剃頭　聽話陳展鵬獲加薪：最好簽到我退休！ [壹週刊

2017年1月12日星期四

肯加監剃頭　聽話陳展鵬獲加薪：最好簽到我退休！ [壹週刊 - 1401] __,陳展鵬,展鵬,陳展,M1,

陳展鵬啱啱拍完新劇《同盟》，即將便要赴橫店拍古裝劇《天命》，被大台力谷。

探熱針

肯加監剃頭　聽話陳展鵬獲加薪：最好簽到我退休！

入行已經 23年的陳展鵬，憑《城寨英雄》初嘗視帝滋味，事業全面起飛！上週六（ 7/1），更在《勁歌》頒獎禮擸走三個獎；緊接要埋位拍古裝劇《天命》，大台狂谷。

據悉，出爐視帝還有年半才約滿，大台怕有閃失，拿拿臨提早加監，有指續約五年的他更獲大幅加薪。公司派糖，陳展鵬肯答應恩師剃頭拍清裝外，還落足鞋油勁擦：「最好簽到我退休，簽起碼十年以上。」

擦珍姐唔反抗

時來運到的陳展鵬，上週六在《勁歌》總選竟然可以同一班歌手爭長短，憑《城寨英雄》主題曲《從未知道你最好》及《巨輪 2》主題曲《誰可改變》連奪三獎做大贏家，自稱忙拍劇冇時間練歌的他，因為咪嘴換來網民噓爆。

有大台撐腰力捧，話之你！陳展鵬一劇接一劇，新作《乘勝追擊》下週出街，稍後又要埋位拍古裝新劇《天命》。貴為曾勵珍愛將，成功上位的陳展鵬未有鬆毛鬆翼，繼續做聽話乖乖仔。在新劇飾演乾隆寵臣和珅，公司要求剃頭，陳展鵬冇扭計，話剃就剃。

「林峯喺公司咁多年，一直都唔肯剃頭，仲有鄭嘉穎紅咗之後都係咁，所以煎 Pang做咗視帝仲肯剃頭唔詐型，珍姐（曾勵珍）覺得佢勁聽話，四圍同啲監製讚佢。」一名無綫人說。

上週二（ 3日），陳展鵬聯袂《城寨》兼《同盟》好拍檔胡定欣、影后鮑起靜、陳山聰等食煞科飯。緋聞女友胡定欣坐喺陳展鵬隔籬。

陳展鵬大豐收，人都風騷啲，全晚不停做三陪。

08年得伯樂曾勵珍安排回巢大台，即係有珍姐先有今日，所以伯樂話剃頭，陳展鵬唔會 say no。

上週六（ 7日）《勁歌》總選，陳展鵬憑《城寨》及《巨輪 2》的主題曲，竟然連奪三獎，比起力捧中的真•歌手鄭俊弘仲要多。可惜唱歌咪嘴，惹來一片噓聲。

上月台慶頒獎禮，陳展鵬終憑《城寨》奪視帝。

加薪捧做歌手

你識做時我識做！據知，陳展鵬答應同大台提早加簽五年約，公司會落力捧和加幾倍人工外，亦會安排他出唱片，做雙線視帝。

「煎 Pang平均每年拍兩至三個劇，近幾年都 keep住高產量，總之有監製攞劇本俾佢，佢都好少推同唔會揀擇。其實之前拍《張保仔》佢都試過剃頭，仲搞到頭皮發炎，嗰陣煎 Pang都驚生唔番啲頭髮㗎！所以今次又肯再剃，都係明擦珍姐。

「五年約話長唔長，話短唔短，公司開出嘅條件亦有誠意，最重要係答應捧佢做埋歌手； N年前煎 Pang簽過環球但出唔成碟，呢件事佢一直耿耿於懷，希望可以喺樂壇做出成績，話要威番俾放棄佢嘅人睇喎！」知情者說。