安德尊平時扮鬼扮馬咁叻，唔講都唔知佢原來係唱歌出身，真係估佢唔到呀！九十年代初期，佢喺亞視主持兒童節目《德尊老師》已好出位，94年轉投無綫主持《城市追擊》、《全線大搜查》。當年安德尊貼身訪問「慾海肥花」，肥花對佢起痰，扯住佢件衫當眾示愛兼求婚，令人記憶猶新。
不過，唔知有冇人記得，原來安德尊係唱歌出身嘅呢？87年，佢參加亞視嘅《未來偶像爭霸戰》，扮張國榮跳住唱《stand up》，唱就唱得麻麻地，跳到成隻馬騮咁，好有娛樂性。出盡力咁跳咁唱，最後，比賽輸咗，但係拎到個「最佳台風獎」，好過冇啦，同屆冠軍係甄楚倩。佢都出過歌，有首叫《錢不夠用》，仲拍過MV！
向來唔多講自己嘢嘅安德尊，有指佢係中英混血兒，英文名叫Anderson Junior！仲有呀，佢係粵語片小生曹達華嘅唯一契仔兼徒弟，大家都係台山人，07年曹達華喺英國病逝，佢都有飛去送殯！
來源 source: http://s.nextmedia.com
|
鍾意就快D Share啦！
|
|
|
