雨僑坐天台邊緣，震住擺出厭世表情！
娛樂偵訊
震住跳樓 雨僑跌傷膝頭
近年主力做 KOL同網購生意的雨僑，回歸電影圈接拍邱禮濤執導新片《常在我左右》。
先苦後甜，一埋位，就要拍重頭戲。週日（ 8/1），劇組於中環九如坊拍跳樓戲，嚴重畏高的雨僑，顧得腳仔軟，顧不到跳樓動作，全晚震住頂硬上，最終膝頭落地，睇見都痛！
道歉打定底
跳樓戲現場是中環九如坊一幢六層樓高唐樓的天台，下午通告，組機 set燈，入夜後，先由雨僑的替身埋位，企上僅僅得腳掌闊的天台邊，攤開雙手，擺出一躍而下的姿勢。
晚飯時間之後，雨僑終於現身，現場所見，緊張的她目無表情，渾身僵硬。
「佢（雨僑）一嚟到就話自己有畏高，要喺天台開工，有可能影響表現，叫我哋體諒；初時以為佢講客氣說話，到之後叫佢好多次上去睇吓個位，佢一味話等陣先，直到導演嗌埋位，佢面色都灰埋，先知係堅畏高，仲要係嚴重嗰隻。」一名工作人員透露。
驚到走光
工作人員先安排雨僑拍一些扮死的簡單場口熱身，之後拍坐上天台邊鏡頭。埋位望落地面，三秒唔夠，雨僑便嚇得向後縮，更顧得動作又顧不到走位，搞到打底褲露於人前。
終於到戲肉，雨僑要企在最高位置，然後跳落半呎距離左右的軟墊上。未埋位，先打震！幕後人員指畏高的雨僑連爬樓梯上天台最高點都有困難。
「佢真係成個人震晒，雙手捉住條樓梯，隻腳好似唔識郁咁，要後面個工作人員推佢，先慢慢爬到上頂。」
膝蓋着地
上到天台最高點，替身先仔細向雨僑講解動作，再即場試跳。足足試了七、八次，雨僑才儲夠信心，跳落半個人高的軟墊上。
現場工作人員說雨僑全身震住埋位，頭兩 take，交到動作但又唔夾表情，拍第三 take時更因為畏高緊張的關係，搞到膝頭先落地，在軟墊上坐足成分鐘，雨僑才可以起身再拍。
「我好驚，真係好驚……我又笨手笨腳唔識落地，搞到擦損晒！」雨僑說。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
