婷婷（左）跟 Smily（右）異口同聲地以「坐不定」來形容自己，指搞跟露營相關的生意是名副其實的寓工作於娛樂。
壹盤生意
出租露營用品 「野人」高峰賺九萬
「親親大自然」的熱潮正盛，行山露營的人群多得跟到了文青市集無異，而近日環保組織——「結束一桶專棄」發起人馮詩麗在大帽山上
發現約十公斤垃圾帳篷的事件，終於把靚景靚相下的殘酷事實揭露於人前；人們只懂享受「打卡」的一刻快感，但環保觸覺卻遠未能追貼潮流而有所提高，最後落得一地垃圾的唏噓場面。
謝芷琳（ Smily）與李雅婷（婷婷）於二○一三年成立「郊享樂」（ Worry-Free Camper），主力出租露營用品及搞包團服務；由原先費盡心神推廣露營文化，到現在訂單多得應接不暇，旺季時更可月賺近九萬元，可說是直接受惠於郊遊熱潮。生意愈做愈好理應無憂，但她們卻來個反高潮，推出「野營不留痕」八折回贈計劃。「好簡單，你有自備餐具、做廢物分類同埋將全部垃圾帶返市區處理，就已經達標。」香港人出名現實，因此二人就以最現實的方式，以錢換力，寧願賺少點，也望推廣環保露營。
地點就腳 方便交收
走進二人集工作、存貨及居住於一身的西貢村屋，發現她倆是名副其實的「人在野」。「哈哈！我哋搬咗嚟半年，不過仲未整上網。」今年廿六歲、皮膚較白皙的婷婷跟廿九歲的 Smily一樣留着短髮，但卻意外地文靜，細問下才知是文人出身。三年前，還在港大修讀翻譯的她在澳洲工作假期時認識到在那邊工作的 Smily，同是空手道啡帶的二人一拍即合，開展了野營之路。
「喺澳洲，你喺國家公園門口就已經租到所有露營裝備，但當時我放假，兩手空空返嚟香港想租裝備去 camping，點知發現呢類服務少之又少。」讀商科出身的 Smily結果跟當時仍是學生的婷婷用積蓄五萬多元開始了此盤生意，由只有七至八個營應付二十人的訂單，擴充至現時坐擁超過八十個不同類型的帳幕、提供三百人的活動裝備，成功秘訣之一，正正是選址得宜。曾租用「二人裝備套餐」的客人 Shadow同意西貢鄰近各個營地可方便交收，並指收費三百八十八元算是公道。「當時我係臨時決定去露營，而佢哋可以即日交收，做嘢好有效率，所以我覺得唔錯。」
包裝備包食材 六人則成團
入行門檻不高，加上各媒體紛紛出盡力分享郊遊熱點，同類公司因此愈開愈多，但守得下來的卻意外地少。「三年前我哋係第三間專做出租露營用品嘅公司，呢幾年睇住好多細規模嘅出現，例如只有十人裝備出租咁，有啲真係睇住佢開又睇住佢執。」當郊遊熱碰上網購潮，很多人選擇了以平價購入用品過吓癮，而非以租借為首選。要在行頭內站得穩腳，郊享樂除了會主動聯絡公司及學校這類大客尋求合作外，更會提供度身訂做的包團服務，啱晒有老有嫩的家庭說去就去。
「我哋會準備晒裝備、食材同活動素材，俾父母同仔女玩。」包團至少要有六人，活動可按需要而制訂，平均收費為六百元一位。大情大性的 Smily及婷婷直言不是走溫柔「服侍」路線。「我哋想製造個環境，令你唔使計劃及帶太多嘢去享受露營，並非係你哋去到咩都唔使做等我哋做。」常見活動包括用錫紙及紙箱自製戶外焗爐，讓小孩可以即場製作曲奇，另設有戶外探索書籍及星空圖，讓小孩真正從書本跳進草地學習，感受戶外帶給他們的一切。「後生訓練團嘅可以去東龍島露營，我哋中間可以加插沿繩下降同攀岩，再安排相關導師去帶領。」
外國人最污糟 香港人最愛抵賴
「依家係多咗人愛護環境，定單純多咗人去跟潮流，其實大家都有答案。」坐在大網仔營地、背對滿地垃圾的婷婷幽幽地說。「大雨時周地垃圾嘅情況係最嚴重，大家可能急住離開，但啲睡蓆、防潮蓆又濕晒沾滿晒泥，結果怕煩就唔要。」見盡露營人士各種浪費行為的二人並沒因此盲目，反而決定把一直有推行的回贈計劃加碼，只要租用裝備人士在露營時拍照證明「自己用具自己帶」，並把垃圾帶回市區才分類棄置，就可享用八折優惠。「你去玩就有責任做番個負責任嘅露營者，而我哋都有責任去推廣教導一班用家。」責任二字，說易做難，但她們做到。
反高潮的不單只有回贈計劃，各地人使用租借用品的實況同樣會令人吃驚。「用到好污糟去還嘅人，八成都係外國人，相反中國人知道有按金，所以會清理得好好先還，仲會好緊張問會唔會扣錢。」你以為用得最污糟的人就是最難搞嗎？其實不負責任的用家才是。「外國人會認錯接受罰款，但香港人反而係俾咗我哋先算，到被發現時仲會反問係咪屈佢哋。」 Smily無奈地指出只是要求有基本清理而非徹底洗乾淨，但無理抵賴的人依然不絕。
淘寶客服為求得客人一句好評而卑躬屈膝，大家一定見怪不怪；但 Smily卻出名快人快語，堅持服務非服從。說話不帶尾音的她經常因租用條款上的種種，而收到投訴指態度「不佳」，更被客人以一句：「你租得俾人就預咗會污糟啦。」作反駁。但她堅持原則，「佢哋唔只覺得我好直，可能仲會認為我好衰！有人試過放我哋嘅煲上炭火度用，結果黑晒接近要報銷，問心你接唔接受到我下次出租啲咁嘅裝備俾你？有無諗過下手用家感受？」將心比己，從來不易，要改變香港「以顧客至上」的思維習慣，更非一時三刻可做到。
回望熱潮，最近大受歡迎的鶴咀，正正是屬於海岸保育區的範圍，但不少港人為了看日出不惜把營幕紮在路邊就算。二人對此表示無奈，「香港合法營地有四十一個，有啲地方唔定為露營地點一定有原因，可能係因為危險，亦可能係唔想有太多破壞足跡。」賺錢及打卡，同樣也要來得有品有德，否則再美的環境，數年後也只會變成一塊爛地。
營業資料（ 12/16）
營業額（露營團+裝備租借）：$128,000
裝備補貨/消耗：$7,500
貨倉租金：$7,000
送貨開支：$2,400
出團開支：$7,000
薪金：$9,600#
廣告：$3,500
雜項：$3,000
盈利：$88,000
#一次出團人手費用： 4名兼職導師、 2名 helper
開業資料（ 04/13）
貨倉租金上期：$5,000
按金：$10,000
貨倉設備：$3,000
貨物裝備：$24,000
辦公文儀：$10,000
網站設計：$3,000
總投資：$55,000
撰文：黃綺敏
攝影/攝錄：關永浩
ed_bn@nextdigital.com.hk
|
鍾意就快D Share啦！
|
|
|
