楊穎（Angelababy）之前同鍾漢良拍咗套大陸劇《孤芳不自賞》，不過自劇集喺星期一（2號）推出以嚟，不斷俾人指用假布景、劣質CG、甚至用替身代替兩位主角，到必要時候先用Key圖嘅方式（大陸叫「摳像演出」）出現番。大陸網上啲指控仲話，Baby同鍾漢良收1.2億天價人工，但原本承諾咗幾十日嘅檔期大幅縮減，兩人同場嘅日子，只係得番兩日咁多。對於呢啲指控，Angelababy、鍾漢良同《孤芳不自賞》劇組都各自發聲明，當中以Baby嘅聲明措辭最嚴厲，指責造謠者捏造假消息，損壞咗Baby名譽權，已經委託咗律師調查，會保留追究權利，聲明仲話：「此種行為誤導社会公眾，引發網友猜疑，使楊穎女士受到嚴重誤解，社會評價無端降低，形成了極壞的負面影響。」而鍾漢良喺聲明到話呢啲不實言論係違背事實，構成誹謗。鍾漢良已經向相關人士發出律師信，以法律途徑解決此事，佢亦喺聲明中警告，發布或者轉發呢類訊息嘅網民，都會涉嫌侵犯到鍾漢良嘅名譽權，要立即刪除相關訊息。至於《孤芳不自賞》劇組就喺聲明中否認所有指控，話係「嚴重失實的內容對本劇惡意的污衊，產生咗越極差的社會影響。」呢份聲明仲為Baby同鍾漢良澄清，指兩人除咗一早聲明嘅工作以外，其餘時間都為該劇拍攝。
來源 source: http://s.nextmedia.com
|
鍾意就快D Share啦！
|
|
|
