張崇基、張崇德兄弟噚晚喺柴灣出席「第三屆童心同行慈善音樂會」，細佬崇德話聖誕同屋企人去咗旅行，農曆新年會接登台工作，至於大佬崇基就話聖誕大家各有各玩，所以新春唔會出埠。崇德話今年除咗會搞一個音樂劇，如果book到場地，或者喺年尾開演唱會，唱片就由崇基去主導。早排劉美娟接受訪問時話一對仔女有選擇不語症，崇德話囡囡日晴已經好番，但囝囝日希個病就嚴重咗，崇德話：「喺學校冇好過，本身呢類小朋友返到學校係生存到嘅，學習冇問題，但就好易俾人蝦，有啲同學會特登撩佢講嘢，睇下佢係咪唔講嘢，我知道之後有同學校溝通，已經緊密處理。」自從報道出咗之後，有好多人問崇德兩公婆，因為佢哋嘅仔女都有類似問題，崇德話：「我都建議佢哋睇書，又同佢哋分享呢個症嘅跡象係點，平時我個仔講嘢好開心流利，但返到學就唔講。」問到係咪囝囝被欺凌?佢話：「唔會，佢喺幼稚園已經係咁樣，初時不以為意。上小學之後發覺唔係好妥，又收到投訴，返到屋企問個仔，佢講番當時嘅情況，只係嗰刻佢唔識去反駁，同講出個真相，所以都算係欺凌嘅。」講到治療方法，佢話除咗睇書之外，亦有家長透過facebook提供意見：「嗰位家長個女本身都有呢個情況，介紹咗一個西人嘅心理學家畀我，遲啲會帶個仔去試吓。」
| 子女患上選擇不語症，張崇德話多咗好多家長透過facebook提供意見。( 攝影：黃曉妍 ) | | |
來源 source: http://s.nextmedia.com
|
鍾意就快D Share啦！
|
|
|
