【東方日報專訊】當年出道負評爆燈的鄭欣宜前晚在《叱咤頒獎禮》爆發「洋葱彈」，橫掃「我最喜愛的女歌手」等三獎，全場起哄支持！相反去年備受網民力熱捧、在上屆《叱咤》贏開巷的吳業坤今屆民情急降，冧莊「我最喜愛的男歌手」竟然被噓，天堂地獄大逆轉！
每年《叱咤頒獎禮》總會令現場歌手「悲喜交集」，欣宜前晚憑一首《女神》成為大贏家之一，贏得歌迷歡心亦贏盡聲勢，當宣布奪得由現場8,000名歌迷投票所得的「我最喜愛的女歌手」，她更即時爆喊，自言非大家所想般堅強！欣宜又重提當年扮「白雪公主」咀吳卓羲，最後接獲300宗投訴，她說：「我記得我戴住皇冠扮公主，畀人笑係『死亡之吻』，我好記得！我係好介意！我唔大方，多謝笑過我嘅人畀我推動力。」
其後，大會再宣布《女神》贏埋同是投票的「我最喜愛的歌曲大獎」，眼淚兩行的欣宜說：「六年前我攞女新人銅獎，返屋企冇人同我慶祝，對住四面牆。我覺得唔係賺到呢首歌，係賺到好多錫我嘅人，我知今晚返屋企會有好多朋友同我慶祝！」欣宜的率性流露，不少歌手都被她的「洋葱彈」炸到眼濕濕，還獲得觀眾「一面倒」支持，令當年的「負皮女」變成萬千寵愛的「女神」，亦引證現今樂迷口味「瞬息萬變」，當下掌聲過後隨時亦可換成噓聲！
陳柏宇倒灶：唔攞比攞更好
吳業坤在去年《叱咤》舞台爆紅，但前晚宣布冧莊攞現場投票的「我最喜愛的男歌手」時，因賽前奪獎呼聲最高的是陳柏宇，故當坤坤得知獲獎亦嚇到「發呆」，摸摸下巴一副難以置信的樣子！台下掌聲中同時傳來不少「噓聲」，與去年「民情爆燈」相比可謂天與地，加上欣宜獲獎時全場洶湧反應，難怪他形容自己似「坐過山車」，由天堂跌落地獄。
坤坤在慶功宴受訪時講到冧莊攞獎，他坦言冇諗過可以再攞：「呢個獎確實係帶咗好大壓力畀自己。（有網民唔認同你再攞？）我諗真係有一班係冇投票、有班係有投票，我都要開始學吓唔可以咁介意呢啲說話。（覺得個獎送你一程？）係一個好奇妙嘅旅程。」至於入行十年的陳柏宇終首奪「男歌手銀獎」，對於「我最喜愛的男歌手」大熱倒灶，Jason直言幾好：「呢個Moment我覺得唔攞比攞更好，唔使驚自己唔值得攞呢個獎，同埋大家會繼續戥我唔抵，係雙贏，唔會尷尬！」他又笑言失獎是恰到好處：「唔令大家失望，亦唔會攞到獎後有好大壓力畀自己。」
慶功滿場飛 帶三獎祭亡母
相比欣宜在慶功宴上風騷得多，滿場飛的她頻呼：「好癲呀呢件事（攞獎）!（祖兒同你擁抱完後話你『來勢胸胸』？）佢都『來細胸胸』呀！哈哈哈！（冇諗過攞三個獎？）冇諗過！傻咗呀！真係癲咗！」提到戴上亡母眼鏡上台，欣宜指想講給自己與媽咪知道：「孝順唔係錯，因為冇佢就唔會有我，一定要多謝佢。」又透露可能帶同三獎返加拿大祭亡母，成功「爭氣」。欣宜提起父親鄭少秋時一副冧滋滋，指對方曾約食元旦飯，可惜因頒獎禮而推辭，父親才恍然大悟：「Daddy有睇晒，因為佢係第一個Send Message畀我嘅。」
記者昨日聯絡秋官，他亦戥女兒獲三獎而開心：「開心佢可以面對自己，唔會畀人打沉。」講到欣宜當年受盡負評？秋官坦言當時很肉赤，當看到女兒攞獎便第一時間傳短訊恭喜。問到5月開演唱會時可會請女兒做嘉賓？秋官指不少人有這提議，但要交由欣宜的唱片公司去安排。
文：音樂組
攝：鄭家俊、司徒國榮、林蔚恩
|
鍾意就快D Share啦！
|
|
|
