藝人黃翠如出席銀行強積金活動，她表示剛拍畢劇集《使徒行者2》香港以外的外景部份，返港準備跟家人度過農曆新年，「收爐」了，續說：「過年後就繼續係香港拍攝。（新年會唔會去旅行？）新年得3日假，所以冇啦，留喺屋企都好，如果假期長啲都想去，因為我有個細妹喺英國開雞蛋仔檔，本身想去搵佢，但太短時間去唔到，呢個妹係完成咗我屋企嘅退休生活，以前成日都想開一啲小生意。」又謂妹妹本來是做記者，但突然有一日決定到英國開雞蛋仔檔，問到翠如有否入股？她說：「佢唔想我入股，佢想一個人搞，攞晒所有積蓄去開一個戶外檔位。（搞到有聲有色？）唔係，開咗未夠半年，當地嘅人會奇怪雞蛋仔係咩，佢賣嘅係當地小食價錢，用呢個方法去維生，佢嘅生活好開心。」
她續透露自己亦有一個開糖水舖的夢想計劃，問到何時實行計劃？她說：「依家鋪租好貴，諗緊有冇咩其他方法，我有個細妹係畫畫，諗緊想有間糖水舖可掛起佢啲畫，一路賣佢啲畫，一路賣糖水，同埋糖水本小利大，我哋全家都好叻煮糖水，特別係中式糖水。」又謂以前想大學畢業後就實行：「以前諗住依家都開咗㗎啦，依家最細個妹都大學畢業出嚟做嘢，會想實行，想5姊妹一齊做一個小生意。（今年內？）要等細妹喺英國返嚟先，再唔係我哋一齊過英國喺雞蛋仔檔隔籬賣糖水都開心，畀心機儲多啲錢先。」
帶定「魚蝦蟹」去蕭正楠家拜年
她又稱新年會預留一日到男友蕭正楠家拜年：「一定要嘅禮貌，到時會帶埋「魚蝦蟹」去贏20、30蚊。（唔驚破壞形象？）好彩我個形象唔包括呢啲。」問到有否留意好友洪永城（Tony）及唐詩詠（Natalie）疑似情變？她即說：「我同佢哋兩個私底下冇傾感情事，同Natalie主要傾食，因為我哋兩個都好鍾意食嘢，同Tony就傾工作多嘅，過年都會聚一聚㗎啦，到時幫大家八卦吓。（分開約定一齊約？）我哋係一個group，梗係一齊約。（仲係一個group？）係呀，一大班朋友。」
|
鍾意就快D Share啦！
|
|
|
