馬明好MAN呀！
藝人馬國明與朱千雪到尖沙咀街頭出席宣傳活動。近日與黃心穎關係逐漸浮面的馬明，日前獲女方「確定關係」，當着記者面前大讚他「乖仔、悶有悶好」，又直認得馬明一個男生正在了解中。
讚心穎唔扭擰
馬明聽到記者轉述，即笑着回應：「咁犀利？佢冇同我講，真定假？了解吓先啦。（狂讚你。）咁開心？有人讚都開心嘅。（話得你一個？）我都唔會同時間約好多女仔嘅，不過我冇收到生日禮物喎。（你生日飯局都冇預佢，攜眷出席嘛。）冇咁快啦，都話了解吓先，但暫時未有再約，大家都忙，好怕再講，會被追問幾時結婚。」
雖然馬明未有認愛，但提到「女追男」，他即man爆謂：「最唔鍾意呢樣嘢，點解要講到女仔主動？我約佢，而且唔係第一次就得，約咗兩、三次㗎，要睇吓得唔得閒。（覺得心穎點？）佢係個幾爽嘅人，唔會扭扭擰擰。」
為爸爸換車
當被問到換車載心穎，馬明直言暫未接載過對方。對於被指「慳住換車」，他坦言：「我爸爸唔係好有錢，我嘅嘢要靠自己。我覺得係寶物沉歸底，我寧願畀人話慳，都好過畀人話做水魚，我買樓都係趁樓市回落嘅，況且架車邊有咁快轉新款？最快都要3年」
對於取車當日被狂拍照，馬明即呼籲記者：「換車係方便爸爸上落嘅，以前架車高身啲。嗰日我媽媽同姐姐唔想上鏡，一條街追住狂影，鎂光燈係咁閃好辛苦，我又唔擋鏡頭，真係唔想再糾纏落去，希望大家幫幫手。即使（與心穎）去食飯睇戲，我哋都大方企定，呢個世界依家邊有秘密吖？」
取消通告休息
至於日前拍《深宮計》狂踩27小時，馬明解釋：「因為要就米雪嘅期，佢冇時間再拍嘞，加上又有打戲，但公司第二日都取消通告，畀我哋休息番。」
來源 source: http://hk.on.cc
|
鍾意就快D Share啦！
|
|
|