想知一個藝人有幾紅，唔係睇票房收視率或唱片銷量，係睇佢個社交網嘅Follower人數同埋Like數Click rate有幾高，無論奀星巨星幾乎個個都要跪低開個社交網戶口，實行我手寫我心，實質啲用途包括宣布結婚拍拖離婚分手有喜，你睇天后王菲離婚都喺微博宣布就知「呃Like」谷人氣大有人在，開工食飯放狗敷Mask跑步旅行瞓覺乜都有，但搞出大頭佛都有唔少例子，好似徐濠縈喺私人戶口Post同陳子聰合照但被出賣瘋傳，搞到何超儀都冇面畀寸佢有「分享症」！我Nuts哥最深刻嘅，梗係陳浩民舊年溫馨Share手起刀落幫就嚟生B嘅太太「剃毛」嘅「寫真」，佢話係紀錄美麗時光，仲話好多網民睇到感動落淚喎！我認，我真係有落淚，係笑到落淚呀喂！
「國際章」唔係浪得虛名
網民畀Like當然皆大歡喜，但要預咗隨時換嚟一堆「負皮」！章子怡早排開心Share老公汪峰將巴士扶手當吊環咁玩嘅短片，成班網民狂鬧話唔文明，影響他人，章子怡隨即刪片兼留言「sbtd」再附加一個挖鼻符號！好多網民解碼話「sbtd」係內地粗口俗語嘅譯音「傻x太多」，仲話章子怡冇品鬧人，其實解讀何其多，當事人又冇開估，有人認為可能係佢知衰認錯：「是不太對」，或者笑埋汪峰一份：「手臂太短」、「誰比他短」，但最大可能係條氣唔順咁話：「說不通的」，一樣符合「sbtd」的拚音！章子怡「奇蕉」一出成功扭轉劣勢，網民可能只顧住解碼，當堂聲都冇聲，一堆「負皮」轉化令批評聲音「收皮」，將英文字母玩到出神入化，「國際章」，你係得嘅！
章子怡比范冰冰早十年上美國《Time》封面，赤手空拳打入荷里活，溝掂億元富豪Vivi訂埋婚唔在講，巴閉到向全球大派花生，同Vivi去沙灘曬太陽打出個八月十五，耍花槍招式多到要玩男上女下，Vivi仲出口錫股，「國際章」呢個朵唔係浪得虛名㗎！
依家佢甘願變「貼地章」益街坊派褔利，分享吓同汪峰嘅小情小趣，點估到係畀人鬧到「貼地」！配合「國際章」身份以國際視野去睇，前美國總統奧巴馬都有鋪「啷」腳癮，逢係茶几餐枱書枱都係佢嘅「落腳點」，如果汪峰係國家元首就話有失大體啫，但佢只係成日被人截糊、上唔到頭條嘅歌手咋，陰功！
搞我老公 同你死過
最令章子怡火滾，應該係李治廷之前一樣Post過扶手當吊環玩引體上升嘅相，但換嚟嘅留言係：「好屌呀！」、「好大隻呀！」小鮮肉李治廷吊冇問題，汪峰就吊出大問題，為保家衞國，就算同班網民鍊過都係人之常情。「sbtd」後，章子怡上載全家賀佢生日嘅相，留言話：「有家心才定，心定則萬事皆明。」即係乜都假，你搞我老公，同你死過！
依家香港人，有冇飯食有冇得瞓有冇真正朋友，都唔係問題，但冇咗個電話、冇得上網玩社交網，就慘過冇咗條命。依家出街食飯，唔係睇啲菜啱唔啱食，係睇間餐廳有冇WI-FI；到啲菜上枱，冇話即刻拎起筷子，而係相機先食，仲要跟手打埋個卡先功德圓滿。
係呀係呀，你喺Facebook有幾百、幾千個Friend，但有幾多係堅交心先？肯定會理你嘅，就係每年5月中母親節，你先會同佢影張相打段嘢呃Like嘅老媽子呀！但阿媽平時問你點解咁夜返你點答？多數都係畀你敷衍兩句趕扯，但啱啱你可能用咗成個鐘去鬥段Facebook Status，跟手仲要數埋個Post有幾多個Like先捨得瞓囉！博Like博關注已經係港人嘅另類社交模式，學杜汶澤話齋，大家都活喺不能冇Like嘅日子。社交網可以we connect，但查實人與人之間有幾connected呢？
|
鍾意就快D Share啦！
|
|
|