08年孔雀開屏嘅倪震背女友周慧敏，喺蘭桂坊舌戰20歲內地大學生張茆，結果搞到一鑊泡要發表引咎分手聲明，但分手僅13天即玩復合兼閃婚，而被倪震錫完即棄嘅張茆人間蒸發，4年後喺香港嫁意大利老公K先生，兩人現育有2歲半混血兒子Omi。已經幾年冇見嘅張茆，日前喺老公陪同下現身尖沙嘴嘅婦產科診所，被《蘋果》讀者李小姐透過「爆相爆片」分享，據知現年29歲嘅張茆又有咗，當時懷胎大約6個星期，到診所接受超聲波檢查。李小姐接受電話訪問表示：「年廿八喺婦產科診所見到張茆同K先生，初時都冇留意係佢，但聽到姑娘叫張茆個名，先至認到係佢囉。」當年一把長曲髮又愛性感打扮嘅張茆，o依家做咗賢妻良母，剪咗一頭短髮兼零化妝，同當年嘅性感尤物完全兩個樣。着波鞋打扮隨意嘅張茆，喺老公陪同下接受醫生檢查，李小姐話：「見佢哋出房之後，表情好似有少少擔心，張茆挨喺K先生身邊，姑娘同佢講有咗6個禮拜。」問到兩人係咪表現得好開心？李小姐表示：「張茆點頭話OK，表現好平常心，冇乜特別表情，反應唔係太大，相信報告應該正常，只係有啲擔心。」據知，張茆光顧喺婦產科診所，做產前檢查收費900元。近年張茆愛喺微博分享囝囝嘅逸事，經常上載一家三口相片，幸福滿瀉。佢曾撰文自勉：「如果選擇在低谷裏打轉，甚至去逃避、仇視現實，那麼永遠也走不出來，只會把自己困死。所以啊，最傷心最艱難在當下都會痛不欲生不知所措，只要勇敢的走出去，機會和幸福總會被你重新找到。」
|
鍾意就快D Share啦！
|
|
|
