歌手鄭欣宜早前在四大頒獎禮上共贏得八個獎項，榮升大家的「女神」，她表示2016年很幸運，全靠大家喜歡歌曲《女神》背後的意思才得到好成績，她坦言：「其實出呢首歌之前行內有好多負面聲音，有好多我敬佩嘅老師都話呢個市場唔需要一首咁嘅歌，因為唔係情歌、主流音樂，但我冇畀佢哋阻止，我好相信呢首歌背後嘅意思。」
講到早年大家對欣宜的印象多是負面，近年終獲大家認同，欣宜表示：「真係好大滿足感，可以由我最討厭變咗我最喜愛，真係奇迹，娛樂圈好難捉摸，我今年入行第九年，頭五年我花咗好多時間希望大家喜歡我多啲，但只會得到更唔好嘅嘢，到後來我決定唔好理，因為根本冇得理，反而就得到大家認同，呢個真係估唔到，所以既然控制唔到，不如做自己鍾意做嘅嘢。」
思想似60歲老人家
講到好友吳業坤前年一曲成名，但隨即引來很多負評，甚至有指去年他奪「我最喜愛的男歌手」時惹來噓聲，問到她可怕自己條路會如坤坤般變得難行？自嘲思想如60歲老人家般豁達的欣宜表示：「睇你點睇，可能好好彩嘅係，我係喺噓聲中成長，身經百戰，已經唔care呢啲，其實我喺叱咤完咗都有好多負面聲音，但唔緊要，因為我有努力，同埋無論點都會有噓聲，就算好紅嘅藝人都會有人唔鍾意佢，冇得控制，最緊要都係做好自己，同埋我好好彩，除咗音樂，我又有拍劇、電影、曲奇生意，冇咩時間諗啲唔開心嘅野，都係一種福氣。」
望今年紅館開演唱會
談到今年工作大計，她表示剛拍完劇集，稍後會宣傳電影《29+1》，之後亦要到上海拍戲，期間亦會做新歌，有機會的話今年都想再開騷，問到可會想登上紅館？她坦言：「梗係希望，但順其自然，呢啲冇得急。（想幾時開到？）冇咁諗，紅館同結婚係一樣，冇得限定時間，要天時地利人和。」講到爸爸鄭少秋五月尾將開紅館演唱會，問她可會上台唱歌？她表示未知：「睇佢邀唔邀請我，但我個幾日好似唔喺香港，但未confirm。」
另外，講到有傳欣宜將與關心妍自組公司，聞言她即笑言：「吓？唔會啦，我冇資格做呢樣嘢，我依然好需要掹車邊，通常好紅嘅人先會做呢啲事。」另亦有傳欣宜會把唱片約轉投埋蕭定一旗下，她表示：「多謝大家咁關照我，其實我同星娛樂嘅唱片約喺上年我開騷嘅第一日已經完咗。（簽埋畀阿一？）我未清楚，因為未傾，大家都忙緊，但我真係好幸運，完咗唱片約都仲得到好多唔同單位支持。」
化妝：Samuel@江中平化妝室
髮型：Milk Chan@Xenter
Styling：Constance Lee
場地：hmv kafe
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
