83歲譚炳文心有事氣喘入院
女兒：原來幾大鑊
歌影視兼配音四棲的83歲譚炳文，近年還有份參演杜琪峯的《黑社會》電影系列。前日其女兒譚淑瑩在社交網貼出父親在醫院的照片，並留言：「爸爸唔舒服……原來都幾大鑊，好彩及時發現！」相中面容憔悴的譚炳文靠氧氣罩幫助呼吸，譚淑瑩昨表示因父親曾接受心臟搭橋手術影響肺功能，不時會氣喘。
譚炳文多年前做過搭橋手術，前晚他因氣喘入院，更要戴氧氣罩幫助呼吸。互聯網圖片
現年83歲的藝人譚炳文，演而優則配音，更贏得「配音王子」的美譽，雖然近年減少在幕前演出，但仍不時聽到他的廣告旁白和配音。前日譚炳文女兒譚淑瑩在facebook貼出一張父親面容憔悴戴着氧氣罩吸氧氣的照片，並留言：「爸爸唔舒服，喘氣了兩三天，七姑姐相熟的胸肺專科陳滇光醫生剛巧今早在養和醫院。原來都幾大鑊，好彩及時發現！」
已回家休養的譚炳文昨日受訪報平安。
譚炳文女兒譚淑瑩昨透露父親要休息兩星期。資料圖片
全身檢查
昨日已回家休養的譚炳文接受本報記者電話訪問回應入院一事說：「去咗一日，冇嘢，感冒箒。入院梗係全身check過晒，住咗一日咋嘛，冇事，返嚟休息幾日冇嘢，噚晚返嚟屋企，冇乜嘢，有心。」他笑言到養和求醫，自然會提供氧氣罩吸氧，因為怕病人缺氧。譚炳文還更豪氣表示可以繼續配音工作：「梗係，搵食吖嘛，唔係喺屋企做乜嘢？」
休養兩周
早在今年1月譚炳文出席公開活動時，已透露行路會有氣喘，女兒譚淑瑩昨接受電話訪問談到爸爸病情時，透露沒有大礙：「其實爸爸唔係感冒，年紀大有少少氣管收窄。醫生要佢休息多啲，至少一、兩個星期，始終年紀咁大，同唔好去人多地方免感染，同埋唔可以太勞累。」
譚淑瑩又謂約十五年前，爸爸做過心臟搭橋手術：「當時未有微創手術，所以要成個心攞出嚟做搭橋，做咗成十個鐘，整完個心放番入去，其實佢好叻，但始終年紀大，做完心臟手術都會影響心肝脾肺腎功能，個肺始終會差啲，所以不時會氣喘。」她笑言爸爸喜歡熱鬧，開工時見到人多會特別開心，所以很難阻止他拍戲，只是要求適可而止就算。
採訪：嵐山
|
鍾意就快D Share啦！
|
|
|