戀愛大過天，呢個年代乜戀都有，60歲台灣作曲家李坤城同細佢40年嘅林靖恩玩「爺孫戀」、氹掂港姐陳凱琳嘅鄭嘉穎都大對方22年，曾經有「亞視一哥」之稱嘅林韋辰都同細自己23年嘅李思雅玩「父女戀」，只要啱feel就搞掂，年齡歧視？咩嚟㗎！以前話同個比自己大幾年嘅姐姐仔拍拖咋，就話係搞「姊弟戀」，嘩！啲人對眼瞪到好似P圖咁大，大鑊過要拖出去浸豬籠先平息到民憤咁滯！可想而知，想當年20歲謝霆鋒同31歲王菲發展姊弟戀，真係要承受好大壓力，引起全球八公八婆狂噴口水！
早排霆鋒同王菲被網民發現喺香港機場出現，難得孖咇現身已經夠gimmick，之所以搞到一地花生，就係鋒菲公然忘我咁啜啜啜！霆鋒送王菲機上演呢幕鋒菲吻別，我Nuts哥見到張相，即刻諗起小龍女同楊過，喺古墓難捨難離，一個超凡脫俗、一個一往情深，堅形神俱似囉！呢張相靚到似劇照，好似拍戲咁有feel，唔怪得網民同粉絲都話睇到冧滋滋，話肉緊得嚟又唔骨痹，好羨慕王菲有霆鋒呢個男神錫到燶，又話呢對做乜都係咁浪漫咁冧，鋒菲仲被網民賜下「最匹配的姊弟戀」美譽，其實得來不易！
懶理「媽叉」又盲又聾
想當年王菲同霆鋒手拖手放閃公開戀情，真係心口寫住個勇字！當年事業初起步，仲係MK仔打扮嘅死𡃁 仔霆鋒，夠膽死越級挑戰力追成30歲、離咗婚有個女，事業拋離男方十萬九千里嘅天后王菲，就係因為年紀及地位相距太大，霆鋒成全城箭靶，被臭罵博上位等是常識吧！
一個係天后，一個係冧盡少女心嘅偶像歌手，論當時嘅地位身家名氣，真係有好大段距離，更何況鋒菲年紀相差十一年！只係王菲有高傲性格，死都要將愛情進行到底；至於霆鋒更值反叛之年，日日唱着「活着VIVA」，懶理人媽媽叉叉，兩人愛到眼又盲耳又聾！凡事都有timing，鋒菲又離又合，最後都要分手，各自另覓所愛，結婚嘅結婚，生仔嘅生仔。點會估到，分開十一年後，兜兜轉轉後，始終心繫對方！霆鋒喺《最佳男主角》節目度大方承認：「王菲係我嘅最愛」，王菲又喺微博洩密話關心受眼傷嘅霆鋒，只係兩個齋噏唔行動翻撻，搞到王菲另一閨密趙薇都頂唔順佢哋，無懼做「厚多士」撮合呢對癡男怨女，之後，霆鋒去咗王菲北京香閨又係玩「打茄輪」，「世紀復合」終告揭幕，一天都光晒！
升呢襯得起天后
鋒菲翻撻，粉絲高呼「兜兜轉轉還是一起了，我們又相信愛情了」！依家嘅霆鋒的確今時不同往日，雖然佢依然唔鍾意洗頭，仲係好愛踢拖，但係今日嘅佢已經升呢為最佳男主角、實力歌手、製作人、曲奇餅及製作公司老闆，仲獲封為「米芝蓮之友」榮譽，重點係霆鋒比以前有錢同靚仔好多，呢個package仲唔夠照？升級為男神喎，點會襯唔起王菲？
聽霆鋒阿媽拉姑講，阿仔同王菲復合後變乖，唔再飲咖啡、打機，仲習慣早睡早起，肯去睇醫生，識返屋企同啲老人家食飯添！最驚人嘅「神迹」係，之前霆鋒因長期煮切拋鑊搞到手筋發炎痛到死死吓，又刮痧又食止痛藥，醫生叮囑禁入廚，點知霆鋒轉頭喺機場錫王菲兩啖之嘛，竟然可以「咀到病除」，嘩！真係成個男人返晒嚟！乜傷都冇晒！見霆鋒喺廚房整牛肉、麵包，一啲都唔覺得佢隻手「黐筋」喎！
睇到呢一幕， 王菲真係堅過小龍女，小龍女見到楊過隻手冇咗，乜都做唔到，但王菲只係區區兩個茄輪，已經醫番掂霆鋒隻痛手喇！呢對「神鵰俠侶」現實版，離離合合劇情精彩過小說，希望今次堅可以「幸福快樂咁生活落去」係呀係好老套，但如果老套係代表幸福，呢pair潮人情侶老套一世又點話？
|
鍾意就快D Share啦！
|
|
|