嘉欣勁希望苟姑娘快啲嫁！
藝人鍾嘉欣到銅鑼灣出席活動，專誠由溫哥華返港的她表示：「囡囡都有返嚟，不過今次返香港有啲唔開心，因為之前返香港泵咗30包奶放喺冰櫃，點知發覺冰櫃壞咗，啲奶變壞晒，囡囡要食住奶粉先，佢唔係第一次食奶粉，佢仲好鍾意㖭，因為唔同味道，同埋佢好鍾意揸住個樽，覺得自己係大人！」
勁撐陸漢洋叻仔又夠爽
嘉欣被問到今次返香港會否約苟芸慧等好姊妹見面，她說：「睇吓時間安排，因為佢哋都好忙，我自己今次返嚟都有其他工作，希望可以見到面，應該會見到嘅！（佢係咪已經同陸漢洋拍緊拖？）佢未親口證實，佢話了解中，太好喇，了解多啲呀！我同陸漢洋見過幾次面，我覺得佢好爽、好叻，咩都識，如果佢哋有機會發展，我係相當支持。（佢話視苟姑娘係結婚對象？）如果一個男士可以公開喺傳媒面前咁樣講，係一件好認真、好有誠意嘅事！希望如果佢哋有得發展嘅話，祝佢哋開花結果！」
支持苟姑娘閃婚
問到有指陸漢洋因苟姑娘有個靚仔賽車教練而呷醋，嘉欣說：「其實陸漢洋都好幽默，好鍾意講笑，我估佢應該係講笑嘅啫！（贊成苟姑娘閃婚？）我覺得結婚係個感覺嚟嘅，咁佢都到咗適婚年齡，如果認定到結婚對象，我覺得閃婚都唔緊要，我自己唔係好閃，但都係快結婚嘅，快結婚ok㗎！（苟姑娘有冇問你下半年邊段時間得閒做姊妹？）冇喎，我估佢唔會咁快囉，苟姑娘係慢熱啲，佢話了解中，應該唔會咁快，唔會喺今年。」
煩住幫愛女報學前班
嘉欣又表示近日為愛女報讀學前班而煩惱，她說：「我估唔到喺加拿大嘅情況都咁緊張，好多嘢要搞，報名又要問我哋職業，又要家訪，好忙好多嘢搞！」
來源 source: http://hk.on.cc
|
鍾意就快D Share啦！
|
|
|
