喺14年結婚嘅劉愷威同大陸女星楊冪， 結婚3年外界一直都唔睇好，曾經有報道話楊冪係惡家嫂，同老爺劉丹嘅關係麻麻，甚至經常傳出婚變嘅消息。雖然佢哋兩公婆否認婚變，又喺微博公開發律師信，表明會對造謠者追究法律責，但係平息唔到離婚呢個傳聞。結婚冇耐就生咗「小糯米」嘅劉愷威同楊冪，就算做咗爹哋媽咪都冇改變生活模式，仍然專注喺大陸拍劇賺錢，湊女嘅工作交由女麻女麻負責，係佢哋嘅相處方式認真特別，好少見佢哋晒全家福，劉愷威同楊冪亦好少一齊出席活動，反而劉愷威試過俾人影到喺香港湊女，但係依然唔見楊冪嘅踪影。成日俾話人哋冇影嘅楊冪，終於喺舊年「小糯米」開學嘅時候，現身香港湊女返學放學，不過似乎佢同劉愷威採取輪班制，兩人輪流去接女，擺到明有你冇我！之不過世事無絕對，噚日讀者李小姐透過《蘋果》嘅「爆相爆片」，終於見到劉愷威同楊冪合體湊女。李小姐話噚日係維多利亞幼稚園嘅親子運動會，好多爹哋媽咪同佢哋啲小朋友一齊出席，李小姐話：「劉愷威兩公婆同埋爺爺女麻女麻一齊去咗運動會，呢個運動會喺下晝先舉行，我大約喺2點幾左右見到佢哋，我見到好多項目主要都係爹哋落場玩，反而媽咪企埋一邊冇乜點出聲，亦都冇乜點幫手。」話晒劉愷威同楊冪兩公婆喺大陸都好紅，唔知多唔多家長留意佢哋，又或者同其他家長交流吓湊女經呢？李小姐就話：「唔多喎，佢哋戴晒cap帽，又成日都dup低頭，全程都有啲避忌，似乎唔多想俾其他人見到。」至於多唔多見楊冪出席學校活動，李小姐就話：「我哋都係第一次見，通常都係見到女麻女麻或者爹哋湊，所以我自己都忍唔住影低。」早幾日有網民喺微博貼咗楊冪現身南京母嬰院相片，惹嚟又大肚傳聞，不過楊冪工作室同老爺劉丹都代佢否認呢件事，0依家佢哋兩個喺香港合體湊女，唔知有冇機會同小糯米搵返個妹妹或者細佬呢？
| 其實都唔似係兩公婆...(讀者李小姐提供圖片) | | |
| | | |
| | | |
|
鍾意就快D Share啦！
|
|
|
