吳綺莉：自己衰衝動要反省
藝人吳綺莉繼兩年前再度與女兒卓林爭執導致警方介入，被大批傳媒追訪並有不少揣測，吳綺莉接受本報訪問，直認自己衰衝動半夜搞醒女兒理論才發生口角，坦言是個教訓：「冷靜唔到所以發生口角，要自我反省。」而她在女兒枱面發現疑似鎮靜劑藥物，並為其與同性朋友交往心急追問，令二人關係一發不可收拾，她亦首次講到女兒取向：「佢唔係鍾意女仔，唔好亂傳，佢依家冇拍拖。」
可憐天人父母心，44歲單親媽媽吳綺莉（Elaine），自己情緒未管理得掂，又要面對正值反叛期的女兒卓林，終於爆發母女之間的矛盾和衝突，一發不可收拾之下，於周四晚Elaine因涉嫌刑事恐嚇，被帶返灣仔警察總部協助調查，在拘留所度過整整一夜，而報稱遭恐嚇的17歲女子，正是其女兒卓林。卓林曾於兩年前透過學校報稱身體受到傷害，警方與社工介入調查，今次母女衝突再令警方介入，外界對事件有不少描寫，連日來吸引傳媒追訪，而吳綺莉獲准保釋後獨自一人留守大坑寓所，未見卓林蹤影，她為此眉頭深鎖。
精神差瞓唔安食唔落
Elaine昨日接受本報電話訪問，開腔講事件經過並否認各種傳言，愛女心切的她似乎備受打擊，她直言現階段精神狀態好差，強調事件發展至今，對自己是一個教訓：「係自己衰衝動，半夜三更去嘈醒個女，傾佢嘅交朋友問題，自己脾氣唔好，冷靜唔到所以發生口角，自己都真係要自我反省，訓練自己嘅EQ同IQ。」據知，Elaine因不滿女兒抽煙，並察覺女兒交友出現問題而試圖與女兒溝通，惟對方一直推托，心急追問下令事件一觸即發，卓林為此曾離家出走。講到女兒卓林報警，Elaine說：「做阿媽點會嬲，只會諗方法處理。」
而Elaine接受調查期間，警方曾入屋進行搜證，問到警方入屋搜查目的？她說：「因為報咗警，差人都要循例入屋搜查。」最新消息指Elaine在卓林枱面發現疑似鎮靜劑的藥物，有傳言指有人稱「唔食藥不如死咗去」亦有傳有人因皮膚病問題要服藥，Elaine否認：「冇人有皮膚病，真係唔好再聽外面所講嘅傳聞，依家交畀警方處理，真係唔可以講咁多，反而我依家有胃病，瞓唔到、食唔落，精神好差。」
女兒唔係鍾意女仔
有指卓林與同性朋友同房過夜，早前離家出走時曾向同性朋友借宿，Elaine對此大為緊張。問是否知道女兒的感情狀況？她說：「梗係唔係佢唔係鍾意女仔，唔好亂傳，佢依家冇拍拖。（同個女依家關係OK？）當然唔可以怪個女。（卓林未返屋企住？）係，暫時未，佢喺朋友度住，有同個女聯絡，大家當然有傾，始終係兩母女，冇我話嬲唔嬲，係需要自我反省，要檢討脾氣。（脾氣差係因為飲酒習慣？）好多謝大家關心，我一向好注意身體，飲嘅酒唔係大家想像中咁嚴重，唔係飲嗰少少會鬧人。」
至於講到工作方面，Elaine早年有參與有線節目，但近期未有亮相，她透露與有線正傾談新工作，但由於有線方面亦有需要再作調整，目前暫未有具體工作：「依家做緊設計方面工作，所以發生呢件事都令我好煩惱，希望大家放過我。」而卓林至截稿前仍未回覆。
文：影視組
攝：追蹤組
|
鍾意就快D Share啦！
|
|
|
