入行30年嘅林家棟終於成功「破處」，登上今屆香港電影金像獎「最佳男主角」寶座，真係可喜可賀！人哋話「十年磨一劍」，家棟就用咗比別人多三倍嘅努力，以三十年時間千錘百煉，磨成呢把「電影劍」，為咗磨劍，佢真係犧牲大，磨到自己到依家都仲係無殼蝸牛，租九龍塘住咋！呢位「冇樓、冇水又冇女」嘅「三無影帝」，可以話係歷來最「燶」影帝，窮到燶個「燶」，Lonely個「Lone」！但係比起見慣見熟嘅影帝常客梁朝偉、梁家輝，家棟對電影嘅熱誠，又真係令人欽敬欽敬！
雖則家棟曾聲言「絕對喜歡女人」，但「哪有女」？難怪被口痕友話佢係「HeHe」！就連攞獎當晚，喺頒獎禮後台被家棟失驚無神錫咗啖嘴仔嘅曾志偉，都情不自禁爆咪大嗌：「嘩，依條粉腸！」當你以為志偉一定係信咗家棟係「HeHe」，所以向來玩得嘅佢至咁大反應，咁就錯喇！既然志偉可以為「我一部撼你廿六部」巧妙解畫，呢番「粉腸論」都唔會係表面睇咁簡單！
捱到甩頭髮生頭瘡
正所謂「要取得好吃的粉腸，必須讓豬隻空腹」，空腹咪即係飢腸轆轆，冇啖好食囉！志偉係讚緊家棟當年喺無綫捱足八年大茄，直至喺劇集《娛樂插班生》扮張學友先有人識，之後再憑《大鬧廣昌隆》「大隻廣」、《茶是故鄉濃》「鵪鶉仔」嘅演出深入人心，本來可以穩穩陣陣留喺無綫，年年做台慶劇男主角，正如早兩年佢自己都承認：「如果當年冇離開無綫，經理人合約都簽埋，依家手握十層八層樓都話唔埋！」但家棟偏偏唔鵪鶉，為咗磨劍，毅然走入電影圈由零開始，為求累積經驗，仲有錢冇錢都照做，兼夾做埋多勞少得嘅監製一職，結果捱到甩頭髮、生頭瘡，要知道男人嘅命根不外乎錢、女人同頭髮，家棟咁大犧牲為乜？之唔係「我愛電影」四個大字！呢份對電影既Pure且True嘅熱誠，甚有大學者錢穆當年南來香港辦學嘅精神：「手空空，無一物，路遙遙，無止境。亂離中，流浪裏，餓我體膚勞我精。艱險我奮進，困乏我多情。」
炮製「難得嘅浪漫」
不過家棟嘅「多情」係講緊對電影啫，唔係好關女人事！事關咁耐以嚟，除咗同佘詩曼外，佢可以話幾乎零緋聞，就算被傳同馮寶寶姪女Rossetti Fung拍拖七年，又試過被指拖空姐女友外遊，家棟嘅感情始終好似鐵樹咁難開花，事關家棟專心磨劍，已達至清心寡欲嘅境界！聽吓佢對浪漫嘅睇法：「以前拍拖，我會洗腦，令對方接受我嘅喜好：電影、電影、電影！都有浪漫嘅，試過清晨五、六點Call醒女友，我特登去紅磡寶石戲院轉彎嗰間舖頭買豆漿粢飯佢食，係我難得嘅浪漫！」即係咁，你用「溫兆倫菠蘿包偷取郭羨妮芳心」條橋，OK！要女友食一碌粢飯，然後跑十公里至抵銷到嗰啲卡路里，即使你唔肯娶人，都吹你唔脹！但你下下強調戲院乜乜物物，就點講都唔OK！身為電影監製應該好清楚植入式廣告有幾討厭！如果咁都自封浪漫，我Nuts哥只能夠請英國大文豪王爾德出嚟幫你兜：「愛自己是終身浪漫的開始！」
做監製嘅宗旨就係令投資者唔使蝕本，咁愛自己的確係封晒被劈腿同被分手嘅蝕本門嘅！難怪家棟自爆之前去泰國拍戲，佢話唔使開工就匿埋喺酒店房，因為帶咗兩個編劇過去為自己監製嘅新戲開會！吓！又話「絕對喜歡女人」，唔帶女友去？泰國喎，男人嘅天堂，就算女人去都一樣咁難忘，唔信睇吓白百何！泰國有戲院㗎，家棟話：「嗰陣泰王駕崩，乜嘢娛樂都停晒！」噢，原來冇戲睇，明白晒！
|
鍾意就快D Share啦！
|
|
|